विशेष शिक्षकांमध्ये मात्र संभ्रमावस्था कायम
म. टा. प्रतिनिधी, मुंबई
राज्यातील अप्रशिक्षित प्राथमिक शिक्षकांना डीएलएड अभ्यासक्रम पूर्ण करण्यासाठीची अखेरची संधी देण्यात आली आहे. यानुसार या अप्रशिक्षत शिक्षकांना राष्ट्रीय मुक्त विद्यालयाअंतर्गत (एनआयओएस) डीएलएड अभ्यासक्रम पूर्ण गरजेचे असल्याचे शालेय शिक्षण विभागाने पुन्हा एकदा स्पष्ट केले आहे. यासाठी शालेय शिक्षण विभागाने गुरुवारी रात्री जीआर जाहीर करीत यासाठी ३० सप्टेंबरपर्यंत अर्ज करण्याची मुदत दिली आहे. तर दुसरीकडे याबाबत चित्रकला, कला, हस्तकला यांसारख्या विशेष शिक्षकांबद्दल या जीआरमध्ये स्पष्ट उल्लेख नसल्याने शेकडो शिक्षकांमध्ये संभ्रमावस्था निर्माण झाली आहे.
राज्यात प्रशिक्षित प्राथमिक शिक्षकांची कमतरता असल्याने दहावी उत्तीर्ण झालेल्या अप्रशिक्षित शिक्षकांना कामाच्या अनुभवाची जोड घेत पहिल्या चार वर्षांत पत्राद्वारे डीएड अभ्यासक्रम पूर्ण करण्याची मुभा देण्यात आली होती. त्याला वेळोवेळी मुदतवाढही देण्यात आली होती. सध्या त्याची अंतिम मुदत २८ फेब्रुवारी २०१९ होती. बालकांचा मोफत शिक्षण हक्क कायद्यानुसार, कायदा लागू झाल्यानंतर पाच वर्षांच्या आत सर्व प्राथमिक शिक्षक प्रशिक्षित असणे आवश्यक होते. संसदेच्या मान्यतेने ही मुदत ३१ मार्च २०१९ पर्यंत वाढविण्यात आली होती. मात्र नव्या आदेशानुसार, आता बीएड किंवा डीएड पदवी नसलेल्या प्रत्येक अप्रशिक्षित शिक्षकाला राष्ट्रीय मुक्त विद्यालयाचा (एनआयओएस) दोन वर्षांचा डिप्लोमा इन एलिमेंटरी एज्युकेशन (डीएलएड) करणे बंधनकारक आहे. त्यासाठी अर्ज करण्याची मुदत १५ सप्टेंबर रोजी संपुष्टात येणार होती. त्याला रात्री उशिरा ३० सप्टेंबरपर्यंत मुदतवाढ देण्यात आली आहे.
दरम्यान, प्राथमिक शाळेतील सर्व पूर्णवेळ शिक्षकांसाठी हा नियम लागू असल्याचे शिक्षण विभागाने स्पष्ट केले आहे. आरटीई कायद्यात विशेष शिक्षक ही संकल्पना नसून सर्व पूर्णवेळ शिक्षकांसाठी हा नियम लागू असल्याचे शिक्षण विभागातर्फे सांगण्यात येत आहे. पण शिक्षण विभागाने जाहीर केलेल्या जीआरमध्ये या विशेष शिक्षकांबाबत कोणताही उल्लेख नसल्याने हे प्रशिक्षण त्यांना बंधनकारक आहे की नाही? असा प्रश्न अनेकांनी उपस्थित केला आहे.