पैशावरून वाद; डॉक्टरनं तरुणीचा गाल चावला!

मटा ऑनलाइन वृत्त । मुंबई

पैशावरून झालेल्या वादातून एका डॉक्टरनं २६ वर्षीय तरुणीला बेदम मारहाण करत तिचा गाल चावल्याची घटना मुंबईतील चारकोप येथे घडली आहे. मारहाणीत जखमी झालेल्या पीडित तरुणीवर एका खासगी रुग्णालयात उपचार सुरू आहेत.

सुरेश यादव असं आरोपी डॉक्टरचं नाव आहे. कांदिवलीत राहणाऱ्या सुरेशची पीडित तरुणीशी गेल्या एक वर्षापासून मैत्री आहे. गेल्या शुक्रवारी तो पीडित तरुणीच्या घरी गेला होता. तिथं दोघांचा पैशावरून काहीतरी वाद झाला. हा वाद इतका वाढला की सुरेश यादवनं त्या तरुणीला मारहाण केली व तिच्या गालाचा चावा घेतला.

तरुणीनं केलेल्या तक्रारीनंतर पोलिसांनी अदखलपात्र गुन्ह्याची (एनसी) नोंद करून घेतली. त्यामुळं संतापलेल्या तरुणीनं पोलिसांवर भेदभावाचा आरोप केला आहे. या प्रकरणाची निष्पक्षपाती चौकशी व्हावी, अशी मागणी तिनं वरिष्ठ पोलिसांकडं केली आहे.