अ‍ॅपशहर

डॉक्टरांवरच रक्तदान करण्याची वेळ

उन्हाळ्याच्या सुट्टीच्या कालावधीमध्ये रक्ताचा मोठ्या प्रमाणामध्ये तुडवडा निर्माण होतो. मात्र यावर्षी रक्ताची ही टंचाई अधिक तीव्र झाल्याने सार्वजनिक रुग्णालयांमध्ये डॉक्टरांवरच रक्तदान करण्याची वेळ आली.

महाराष्ट्र टाइम्स 3 Jun 2019, 5:49 am
म. टा. विशेष प्रतिनिधी, मुंबई
महाराष्ट्र टाइम्स.कॉम blood-doantion


उन्हाळ्याच्या सुट्टीच्या कालावधीमध्ये रक्ताचा मोठ्या प्रमाणामध्ये तुडवडा निर्माण होतो. मात्र यावर्षी रक्ताची ही टंचाई अधिक तीव्र झाल्याने सार्वजनिक रुग्णालयांमध्ये डॉक्टरांवरच रक्तदान करण्याची वेळ आली. नियोजित शस्त्रक्रिया पार पाडण्यासाठी मुंबईतल्या पालिका रुग्णालयामध्ये निवासी डॉक्टरांनी केलेल्या रक्तदानामुळे गरजू रुग्णांची त्यावेळची रक्ताची निकड भागली. मात्र प्रत्येक वर्षी उन्हाळ्याच्या सुट्ट्यांमध्ये निर्माण होणारी ही अडचण कशी दूर करायची, हा तिढा राज्य रक्त संक्रमण परिषदेलाही अद्याप सोडवता आलेला नाही.

थॅलेसेमियाच्या रुग्णासह तातडीने रक्ताची निकड असलेल्या अनेक रुग्णांनी शहरातील रक्तपेढ्या तसेच पालिका रुग्णालयांशी असलेल्या रक्तपेढ्यांशी सातत्याने संपर्क साधूनही उत्तर दिले जात नव्हते. रक्ताचा तुटवडा असल्याचे रुग्णालयांमधून लेखी लिहून देण्यात आले. रक्ताची तजवीज करण्यासाठी रुग्णांसह त्यांच्या कुटुंबीयांनी अनेक ठिकाणी सातत्याने संपर्क साधूनही काही उपयोग झाला नाही. निवासी डॉक्टरांनी पुढाकार घेऊन केलेल्या रक्तदानामुळे दोन दिवसांतील नियोजित शस्त्रक्रिया पार पडल्या.

पालिका रुग्णालयाशी संलग्न असलेल्या रक्तपेढीतील डॉक्टरांनी दिलेल्या माहितीनुसार, प्रत्येक वर्षी सुट्टीच्या कालावधीत रक्त तुटवडा तीव्र होतो, यावर्षी तो अधिक तीव्र झाला आहे. यापूर्वी जे दाते रक्तदान करायचे, त्यांना निकडीच्या वेळी कार्ड दाखवल्यानंतर रक्त उपलब्ध करून दिले जायचे, आता मात्र तसे होत नाही. रक्तपेढ्यांकडे विनंती केल्यानंतर गरजेच्या वेळी गर्भवती माता, लहान मुले वा असाध्य व्याधीसाठी रक्त उपलब्ध करून दिले जाते. पालिका वा सार्वजनिक रुग्णालयामध्ये दाखल असलेल्या रुग्णांना रक्त देण्यासाठी प्राधान्य दिले जाते. रक्ताशी निगडित असलेल्या असाध्य आजारांमध्ये रक्ताची उपलब्धता मोफत करून दिली जाते. रक्तपेढ्यांची शहरातील संख्या मागील तीन वर्षांत वेगाने वाढली आहे. त्यामुळे पूर्वी ज्या प्रकारे रक्त रक्तपेढ्यांमध्ये गोळा व्हायचे ते आता अधिक ठिकाणी विभागले जाते.

यासंदर्भात केईम रुग्णालयाचे अधिष्ठाता डॉ. हेमंत देशमुख यांनी सांगितले, की सगळ्याच शस्त्रक्रियांना रक्ताची गरज असते असे नाही. मात्र रक्ताच्या तुटवड्यामुळे कोणतीही शस्त्रक्रिया रखडली नाही. दर आठवड्याला तीन वेळा असे रक्तदान शिबिरांचे आयोजन करण्यात आले आहे. पहिल्या टप्प्यांत निवासी डॉक्टरांनी रक्तदान केले आहे. दात्याची यादी तयार असून त्यानुसार रक्तदान शिबिरांचे आयोजन केले जाणार आहे.

जे दाते रक्तदान करतात तेच रक्ताची गरज असताना पुन्हापुन्हा रक्तदान करतात, त्यामुळे नवीन दाते तयार होत नाहीत. वारंवार फोन करूनही रक्तपेढ्यांमधून प्रतिसाद दिला जात नाही, काही ठिकाणी रक्त उपलब्ध नसल्याचे सांगितले जाते.

- राहुल साळवे, आरोग्य कार्यकर्ता

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज