डॉक्टरांचे आंदोलन अखेर मागे

मटा ऑनलाइन वृत्त । मुंबई

सामूहिक रजेच्या नावाखाली गेल्या तीन दिवसांपासून काम बंद ठेऊन रुग्णांच्या जीवाशी खेळणाऱ्या राज्यभरातील निवासी डॉक्टरांनी अखेर माघार घेतली आहे. राज्याचे वैद्यकीय शिक्षण मंत्री गिरीश महाजन यांच्याशी झालेल्या यशस्वी बोलणीनंतर आज रात्री ८ वाजल्यापासून पुन्हा ड्युटीवर हजर होण्याची तयारी डॉक्टरांनी दर्शविली आहे. याबाबत खुद्द गिरीश महाजन यांनीच माहिती दिली आहे.

डॉक्टरांच्या सुरक्षेची राज्य सरकारकडून हमी देण्यात आली आहे. येत्या १५ दिवसांत राज्यातील विविध रुग्णालयांमध्ये ११०० प्रशिक्षित सुरक्षा रक्षकांची नियुक्ती करण्यात येणार आहे. याशिवाय डॉक्टरांच्या सर्व मागण्या मान्य करण्यात आल्या आहेत. त्यामुळे त्यांनी कामावर हजर होण्याची तयारी दर्शविली आहे, असे महाजन यांनी नमूद केले. आज रात्री ८ वाजता डॉक्टर हजर झाले नाहीत तर त्यांना पुढच्या परिणामांना सामोरे जावे लागेल, असा इशाराही महाजन यांनी पत्रकारांशी बोलताना दिला.

दरम्यान, मुंबई हायकोर्टाने डॉक्टरांच्या आंदोलनावर कठोर शब्दांत ताशेरे ओढले होते. काम करण्याची भीती वाटत असेल तर जागा रिकाम्या करा असेही कोर्टाने सुनावले होते. या पार्श्वभूमीवर राज्य सरकारने आज रात्री ८ वाजेपर्यंत डॉक्टर कामावर हजर न झाल्यास त्यांचा सहा महिन्यांचा पगार कापण्याचा निर्वाणीचा इशारा दिला होता. डॉक्टरांनी ताठर भूमिका सोडून कामावर हजर व्हावे. रुग्णांच्या जीवाशी खेळू नये, असे आवाहनही महाजन यांनी केले होते. या पार्श्वभूमीवर डॉक्टरांच्या प्रतिनिधींनी महाजन यांची भेट घेऊन सुमारे दीड तास चर्चा केली. बैठकीत सकारात्मक चर्चा होऊन यशस्वी तोडगा काढण्यात आला. याबाबत मार्डकडून मात्र अद्याप कोणतीही माहिती देण्यात आलेली नाही.