म. टा. विशेष प्रतिनिधी, मुंबई
राज्यात २१ ऑक्टोबरला होणाऱ्या विधानसभा निवडणुकांच्या प्रक्रियेमध्ये डॉक्टरांना समाविष्ट करून घेण्यात आले होते. मात्र, डॉक्टरांची अत्यावश्यक सेवेची जबाबदारी लक्षात घेता डॉक्टर, परिचारिका आणि अत्यावश्यक वैद्यकीय कर्मचाऱ्यांना निवडणूक कामातून वगळण्याचा निर्णय जिल्हाधिकाऱ्यांनी घेतला आहे.
या कामासाठी दोन दिवस कर्मचारी देणे शक्य आहे, अशा कर्मचाऱ्यांची यादी जे.जे. रुग्णालय समूहाकडून देण्यात आली आहे. निवडणूक ड्युटी न लावण्याच्या संदर्भात जे.जे. रुग्णालयाच्या अधिष्ठाता डॉ. पल्लवी सापळे यांच्यासह रुग्णालयातील वैद्यकीयतज्ज्ञांनी जिल्हाधिकारी शिवाजी जोंधळे यांची भेट घेऊन हा मुद्दा निदर्शनास आणून दिला.
'निवडणूक प्रक्रिया महत्त्वाची असली, तरीही रुग्णसेवाही तितकीच महत्त्वाची आहे. डॉक्टरांना निवडणूक कामात व्यग्र ठेवणे हे रुग्णहिताचा विचार करता शक्य होणार नव्हते. निवडणूक प्रक्रियेमध्ये काम करण्यासाठी रुग्णालयातील अधिकारी व कर्मचाऱ्यांच्या नियुक्तीचे आदेश देण्यात आले होते. चारही रुग्णालयांतील जवळपास ६०० डॉक्टरांचा यामध्ये समावेश होता. जिल्हाधिकाऱ्यांनी रुग्णहिताच्या मुद्द्यावर विचार करून सकारात्मक प्रतिसाद दिला', असे यासंदर्भात जे.जे रुग्णालय समूहाच्या अधिष्ठाता डॉ. पल्लवी सापळे यांनी सांगितले.
जे.जे. रुग्णालय, सेंट जॉर्जेस, कामा, जी.टी. रुग्णालयांतील अनेक डॉक्टर, वैद्यकीय अधिकारी आणि कर्मचाऱ्यांचा निवडणूक ड्युटीमध्ये समावेश करण्यात आला होता. या रुग्णांच्या आजाराच्या निदानासाठी रोज अनेक प्रकारच्या तपासण्या कराव्या लागतात. या बाबी लक्षात घेता डॉक्टरांनी जिल्हाधिकाऱ्यांना निवेदन दिले.