कुलगुरू निवड समितीवर सोनी

म. टा. प्रतिनिधी, मुंबई

मुंबई विद्यापीठाच्या कुलगुरू निवडीसाठी स्थापन करण्यात आलेल्या शोध समितीसाठी डॉ. श्यामलाल सोनी यांची निवड करण्याचा निर्णय विद्यापीठ प्रशासनाने घेतला आहे. नुकत्याच झालेल्या मॅनेजमेंट आणि अॅकडमिक कौन्सिलच्या बैठकीत हा निर्णय घेण्यात आल्याचे विद्यापीठातर्फे सांगण्यात आले.

डॉ. संजय देशमुख यांना पदावरून दूर केल्यानंतर नव्या कुलगुरूंच्या निवडीसाठी नुकतीच राज्यपालांनी के. कस्तुरीरंगन यांच्या अध्यक्षतेखाली शोध समिती नेमली होती. या समितीत सरकारचे प्रतिनिधी म्हणून भूषण गगराणी यांची निवड करण्यात आली होती. त्यानंतर आता विद्यापीठ प्रशासनाने डॉ. श्यामलाल सोनी यांचे नाव शोध समितीच्या सदस्यत्वासाठी म्हणून जाहीर केले आहे. सोनी हे नॅशनल इन्स्टिट्युट ऑफ टेक्नोलॉजी उत्तराखंडचे संचालक आहेत. सोनी यांच्या नियुक्तीनंतर शोध समिती पूर्ण झाली आहे. त्यामुळे आता कुलगुरू निवडीच्या प्रक्रियेला लवकरच वेग येईल.