डॉ. पूनम जे. राज-सातपुते यांचे निधन
अंधेरी पश्चिमेतील आरटीओ लेन परिसरात राहणाऱ्या प्रख्यात स्त्रीरोगतज्ज्ञ डॉ. पूनम जे. राज-सातपुते (४९) यांचा मृतदेह सापडल्याने वैद्यकीय क्षेत्रात खळबळ उडाली आहे. रोबोटिक सर्जरीत नैपुण्य प्राप्त केलेल्या डॉ. सातपुते यांना मधुमेहाने ग्रासले होते. मृत्यूशी झुंजत असताना त्या घरात एकट्याच असल्याने त्यांना वेळीच वैद्यकीय मदत मिळणे कठीण झाल्याने ही स्थिती ओढवली असल्याचा दावा केला जात आहे.
Maharashtra Times 28 Dec 2017, 4:00 am
म. टा. खास प्रतिनिधी, मुंबई
अंधेरी पश्चिमेतील आरटीओ लेन परिसरात राहणाऱ्या प्रख्यात स्त्रीरोगतज्ज्ञ डॉ. पूनम जे. राज-सातपुते (४९) यांचा मृतदेह सापडल्याने वैद्यकीय क्षेत्रात खळबळ उडाली आहे. रोबोटिक सर्जरीत नैपुण्य प्राप्त केलेल्या डॉ. सातपुते यांना मधुमेहाने ग्रासले होते. मृत्यूशी झुंजत असताना त्या घरात एकट्याच असल्याने त्यांना वेळीच वैद्यकीय मदत मिळणे कठीण झाल्याने ही स्थिती ओढवली असल्याचा दावा केला जात आहे. अंबोली पोलिस ठाण्यात डॉ. सातपुते यांच्या मृत्यूची अपघाती मृत्यू अशी नोंद करण्यात आली असून पुढील तपास सुरू आहे.
तीव्र स्वरुपाच्या मधुमेहाने ग्रस्त असणाऱ्या डॉ. सातपुते यांच्या घरातून दुर्गंधी येत असल्याने शेजाऱ्यांनी बुधवारी सकाळी पोलिसांना फोन केला. पोलिस कर्मवीर भाऊराव पाटील सोसायटीत पोहोचले. त्यांनी त्यांच्या वडिलांना पाचारण केले. वडिलांनी अतिरिक्त चावीने दरवाजा उघडला असता, डॉ. सातपुते यांचा मृतदेह आढळला. त्यांचा मृत्यू मधुमेहाची तीव्रता वाढून शरीरावर झालेल्या परिणामातून झाला असल्याचा अंदाज आहे. डॉ. सातपुते यांनी रोबोटिक सर्जरी या नव्या क्षेत्रात अल्पावधीत भरीव कार्य केले.