राकूलप्रीत सिंहची एनसीबीकडून चौकशी

मुंबई : अभिनेता सुशांतसिंह राजपूत प्रकरणात अमली पदार्थांसंबंधी शुक्रवारी अभिनेत्री राकूलप्रीत सिंहची चौकशी करण्यात आली. नारकॉटिक्स कंट्रोल ब्युरोकडून (एनसीबी) तिच्यासह दीपिका पदुकोनची व्यवस्थापिका करिश्मा प्रकाश हिलाही चौकशीसाठी बोलवण्यात आले होते.

सिनेतारकांच्या व्यवहारांचे व्यवस्थापन करणाऱ्या एका मोठ्या एजन्सीशी संबंधित असलेली जया शाह ही या प्रकरणात अटकेत असलेल्या रिया चक्रवर्तीच्या संपर्कात होती. रिया व जया यांच्या चौकशीत राकूलप्रीत सिंह चे नाव समोर आले. करिश्मा हीदेखील त्याच मोठ्या एजन्सीशी संबंधित असून ती एजन्सीसाठीच दीपिका पदुकोनचे व्यवस्थापन करीत आहेत. यामुळेच दीपिका पदुकोनला शनिवारी चौकशीसाठी पाचारण करण्यात आले आहे.

एनसीबीतील सूत्रांनी सांगितले की, 'करिश्माने दिलेल्या माहितीच्या आधारेच आता अभिनेत्रींची चौकशी केली जाणार आहे. दीपिकासह सारा अली खान व श्रद्धा कपूर यांना शनिवारी चौकशीसाठी बोलवले आहे. दरम्यान, या प्रकरणात एनसीबीने शुक्रवारी एका मोठ्या निर्मात्याच्या कार्यालयावर छापा टाकण्यात आला. तेथील एका अधिकाऱ्याची चौकशी करण्यात आली. त्यामध्ये या अधिकाऱ्याकडे काही प्रमाणात अमली पदार्थ सापडल्याचे सूत्रांनी सांगितले.