मासेमारी थांबली, सुकी मासळी महागली

मटा ऑनलाइन वृत्त । मुंबई

माशांचा प्रजनन काळ सुरू असल्याने मासेमारी बंद आहे. त्यामुळे बाजारात माशांची आवक मोठ्याप्रमाणावर घटली आहे. परिणामी जीभेचे चोचले पुरविण्यासाठी ओली मासळी नसल्याने खवय्यांनी सुक्या मासळींकडे मोर्चा वळविला आहे. ग्राहकांनी सुकी मासळी खरेदी करण्यासाठी बाजारात एकच गर्दी केल्याने सुक्या मासळींचे भावही वधारले असून ग्राहकांना सुकी मासळी खरेदी करताना प्रतिकिलो मागे १५ ते ५० रूपये अधिक मोजावे लागत आहेत. सुक्या मासळींचे भाव वाढले असले तरी बाजारातील ग्राहकांची गर्दी मात्र कमी होताना दिसत नाहीये.

माशांचा प्रजनन काळ, खवळलेला समुद्र आणि श्रावण महिना यामुळे बाजारातील माशांची आवक घटली आहे. त्यामुळे बारा महिने मांसाहार करणाऱ्या खवय्यांची चांगलीच पंचाईत झाली आहे. परिणामी या खवय्यांनी सुरमई, बांगडा, खारा बांगडा, मांदेली, कोळंबी, वाकटी, बोंबील, तेंडली आणि सुकट खरेदी करण्यासाठी मुंबईतील शिवडी आणि भिवंडीतील पडघा व कोनगावच्या बाजारात प्रचंड गर्दी केली आहे. पावसाळा संपेपर्यंत पुरेल एवढे सुके मासे घेऊन जाण्यावर या ग्राहकांचा अधिक कल असल्याचे दिसून येत आहे. दरवर्षी पावसाळा सुरू होण्यापूर्वी आणि पावसाळा सुरू झाल्यावर प्रत्येक वर्षी सुक्या मासळींना भाव येतो. साधारणपणे २० ते ५० रूपयांच्या चढ्या भावाने ही मासळी विकली जाते. पण ओली मासळी आणि मटनापेक्षाही सुकी मासळी स्वस्त असल्याने ग्राहकांना ही मासळी खरेदी करणे परवडते असे एका मासे विक्रेत्याने सांगितले.

सुक्या मासळीचा ताजा भाव ( प्रतिकिलो )

> करदीचा भाव २०० ते ३५० रूपये

> वाकटचा भाव ३०० ते ५०० रूपये

> मांदेलीचा भाव १५० ते २०० रूपये

> खारा बांगडा एका नगाला ३०० ते १००० रूपये

> बोंबील ३०० ते ५०० रूपये किलो

> सोडे १२०० ते १५०० रूपये