‘डीएसकें’सह तीन बिल्डरांची चौकशी

ग्राहकांना फसवल्याप्रकरणी गृह राज्यमंत्र्यांचे आदेश

म. टा. विशेष प्रतिनिधी, मुंबई

डीएसके, टेम्पल रोज आणि भगतानी या बिल्डरांच्या मालमत्तांची चौकशी करण्याचे आदेश गृह राज्यमंत्री रणजित पाटील यांनी दिले आहेत. मुंबई, पुणे व ठाणे पोलिस या बिल्डरांची चौकशी करणार आहेत.

फसविल्या गेलेल्या ग्राहकांच्या शिष्टमंडळासोबत खासदार किरीट सोमय्या यांनी गृह राज्यमंत्री रणजित पाटील यांची भेट घेतली. त्यावेळी त्यांच्या दालनात झालेल्या बैठकीनंतर पाटील यांनी तिन्ही बिल्डरांच्या मालमत्तेच्या चौकशीचे आदेश दिले. मोठ्या प्रमाणावर फसवणूक झालेले ग्राहक हे पुण्याचे असून डीएसके बिल्डर्सकडून त्यांची फसवणूक झाल्याने पुणे पोलिस ही या बिल्डरच्या मालमत्तेच्या चौकशीकरिता नोडल एजन्सी असेल, असे ठरले आहे. भगतानी बिल्डर्सने केलेल्या फसवणुकीच्या प्रकरणात मुंबई व ठाणे पोलिस चौकशी करत असले तरी नोडल एजन्सी म्हणून मुंबई पोल‌िस काम पाहाणार आहेत. टेम्पल रोज बिल्डर प्रकरणात मात्र मुंबई व पुणे पोल‌िस चौकशी करणार असल्याचे समजते.

या बैठकीत रणजित पाटील यांना शिष्टमंडळाने या फसवणुकीचा संपूर्ण वृत्तांत सांगितला. यावेळी मुंबई, पुणे व ठाणे पोलिसांचे अधिकारीही उपस्थित होते.