रेल्वे सेवेला पावसाचा फटका; 'या' मार्गावरील लोकल सेवा विस्कळीत

मुंबईः सतत कोसळत असलेल्या पावसाचा फटका मुंबईतील वाहतूक सेवेलाही बसला आहे. रेल्वे रुळांवर पाणी साचल्यामुळं मध्य आणि पाश्चिम रल्वेवरील लोकल फेऱ्या रद्द करण्यात आल्या होत्या. पश्चिम मार्गावरील लोकलसेवा काही तासांनंतर काही प्रमाणात पूर्वपदावर येत असली तरी अद्याप मध्य आणि हार्बर रेल्वेवरील रेल्वे सेवा ठप्पचं आहे.

मुंबईत मंगळवारी संध्याकाळपासून पावसानं हजेरी लावली आहे. रात्रभर झालेल्या पावसानं मुंबईकरांची दाणादाण उडवून दिली आहे. सकाळपासूनच रेल्वे वाहतूक पूर्णपणे ठप्प झाली आहे. मध्य रेल्वेनं दिलेल्या माहितीनुसार परेल - करी रोड आणि हार्बर मार्गावरील वडाळा रोड दरम्यान रेल्वे रुळांवर पाणी साचल्यानं सीएसएमटी ते दादर आणि सीएसएमटी ते वाशी रेल्वे सेवा बंद ठेवण्यात येणार आहे. तसंच, दादर ते कल्याण आणि वाशी ते पनवेल या शटल सेवा सुरू राहणार असल्याचं, मध्य रेल्वेनं म्हटलं आहे.

मुंबईत पावसानं मोडला २६ वर्षातला 'हा' विक्रम, सप्टेंबरमध्ये सर्वाधिक पावसाची नोंद

दरम्यान, पश्चिम रेल्वेवरील लोकल सेवा पूर्ववत करण्यात आली आहे. डहाणू ते चर्चगेट दरम्यान लोकल सुरळीत सुरू असल्याचं पश्चिम रेल्वेच्या अधिकाऱ्यांनी म्हटलं आहे. सध्या केवळ अत्यावश्यक सेवांमधील कर्मचाऱ्यांसाठी विशेष लोकल चालवल्या जात आहेत. त्यामुळे प्रवाशांची संख्या कमी असली तरी उपनगरांच्या दिशेने जाणारे प्रवाशांचा मात्र खोळंबा झाला आहे.

मुंबई पुन्हा तुंबली; रेल्वे आणि रस्ते वाहतूक विस्कळीत; सुट्टी जाहीर

बेस्ट बसचीही वाहतूक वळवली

रस्त्यावर पाणी साचल्यामुळे बेस्टची वाहतूकही वळवण्यात आल्याचं मुंबई महापालिकेकडून सांगण्यात आलं आहे. खालील मार्गांवर वाहतूक वळवण्यात आली आहे.

मुंबईत आजही रात्रभर पावसाचा जोर कायम राहणार असण्याची शक्यता वर्तवण्यात आली आहे. मात्र सप्टेंबर महिना संपायला काहीच दिवस शिल्लक आहेत. तसेच अजून परतीच्या पावसालाही सुरुवात झालेली नाही. त्यामुळे मुंबईमध्ये अजूनही पाऊस कोसळेल का, अशी चिंता व्यक्त होत आहे.