म. टा. खास प्रतिनिधी, मुंबई
हॉर्न वाजवू नका, असे आवाहन वारंवार करूनही वाहनचालक ऐकण्याच्या मनःस्थितीत नसतात आणि यामुळे कमालीचे ध्वनिप्रदूषण होते. यावर पोलिसांनी आता हुकमी उपाय शोधला आहे. हिरवा सिग्नल सुरू होण्याआधी हॉर्न वाजवून ध्वनिप्रदूषण केल्यास चालकांना सिग्नलवरच अडकून बसावे लागणार आहे. खरे वाटत नाही ना, परंतु तशी यंत्रणा मुंबईतील प्रमुख जंक्शनवर बसविण्याचा प्रस्ताव पोलिसांच्या विचाराधीन आहे. पोलिसांनी याविषयी ट्विट केलेला व्हिडीओ शुक्रवारी मोठ्या प्रमाणावर व्हायरल झाला.
मुंबईमध्ये दिवसेंदिवस वाहनांची संख्या वाढत असून त्यामुळे वाहतूक कोंडीची समस्या अधिक गंभीर होत आहे. यात भर म्हणून बेशिस्त वाहनचालक कारण नसताना कर्णकर्कश्श हॉर्न वाजवितात. यामुळे श्रवणदोषाच्या तक्रारींत वाढ झाली असून वृद्ध, लहान मुले यांनाही याचा प्रचंड त्रास होतो. हे थांबविण्यासाठी मुंबई पोलिसांनी एक नामी शक्कल लढवली आहे. मुंबईच्या प्रमुख २० जंक्शनवर एका विशिष्ट प्रकारची यंत्रणा बसविण्यात येणार आहे. हिरव्या सिग्नलची वाट बघत थांबले असताना हॉर्न वाजविल्यास ही यंत्रणा या आवाजाची डेसिबलमध्ये नोंद करेल. या आवाजामुळे ध्वनिप्रदूषण होत असल्यास सिग्नल लालच राहील. जोपर्यंत वाहनचालक हॉर्न वाजविणे थांबविणार नाहीत, म्हणजेच आवाजाची पातळी ध्वनिप्रदूषणपेक्षा कमी होणार नाही, तोपर्यंत हिरवा सिग्नल पडणारच नाही.
प्रचंड प्रतिसाद
याबाबत माहिती देणारा एक व्हिडीओ पोलिसांनी ट्विट केला असून शुक्रवारी तो अतिशय वेगाने व्हायरल झाला. या व्हिडीओला लाखो रिट्विट आणि लाइक्स मिळाले. सर्वसामान्य नागरिकांना याबद्दल काय वाटते हे जाणून घेण्यासाठी आणि जनजागृती करण्यासाठी हा व्हिडीओ ट्विट केल्याची माहिती पोलिस आयुक्त संजय बर्वे यांनी दिली. रुग्णालय आणि शाळा, तसेच मोहम्मद अली रोडसारख्या गजबजलेल्या रस्त्यांवर हा प्रयोग प्रथम राबविला जाईल. ध्वनिप्रदूषण आणि त्यामुळे होणारा त्रास कमी करण्यासाठी आमचे प्रयत्न सुरू असल्याचेही त्यांनी सांगितले.
हॉर्न वाजवू नका, असे आवाहन वारंवार करूनही वाहनचालक ऐकण्याच्या मनःस्थितीत नसतात आणि यामुळे कमालीचे ध्वनिप्रदूषण होते. यावर पोलिसांनी आता हुकमी उपाय शोधला आहे. हिरवा सिग्नल सुरू होण्याआधी हॉर्न वाजवून ध्वनिप्रदूषण केल्यास चालकांना सिग्नलवरच अडकून बसावे लागणार आहे. खरे वाटत नाही ना, परंतु तशी यंत्रणा मुंबईतील प्रमुख जंक्शनवर बसविण्याचा प्रस्ताव पोलिसांच्या विचाराधीन आहे. पोलिसांनी याविषयी ट्विट केलेला व्हिडीओ शुक्रवारी मोठ्या प्रमाणावर व्हायरल झाला.
मुंबईमध्ये दिवसेंदिवस वाहनांची संख्या वाढत असून त्यामुळे वाहतूक कोंडीची समस्या अधिक गंभीर होत आहे. यात भर म्हणून बेशिस्त वाहनचालक कारण नसताना कर्णकर्कश्श हॉर्न वाजवितात. यामुळे श्रवणदोषाच्या तक्रारींत वाढ झाली असून वृद्ध, लहान मुले यांनाही याचा प्रचंड त्रास होतो. हे थांबविण्यासाठी मुंबई पोलिसांनी एक नामी शक्कल लढवली आहे. मुंबईच्या प्रमुख २० जंक्शनवर एका विशिष्ट प्रकारची यंत्रणा बसविण्यात येणार आहे. हिरव्या सिग्नलची वाट बघत थांबले असताना हॉर्न वाजविल्यास ही यंत्रणा या आवाजाची डेसिबलमध्ये नोंद करेल. या आवाजामुळे ध्वनिप्रदूषण होत असल्यास सिग्नल लालच राहील. जोपर्यंत वाहनचालक हॉर्न वाजविणे थांबविणार नाहीत, म्हणजेच आवाजाची पातळी ध्वनिप्रदूषणपेक्षा कमी होणार नाही, तोपर्यंत हिरवा सिग्नल पडणारच नाही.
प्रचंड प्रतिसाद
याबाबत माहिती देणारा एक व्हिडीओ पोलिसांनी ट्विट केला असून शुक्रवारी तो अतिशय वेगाने व्हायरल झाला. या व्हिडीओला लाखो रिट्विट आणि लाइक्स मिळाले. सर्वसामान्य नागरिकांना याबद्दल काय वाटते हे जाणून घेण्यासाठी आणि जनजागृती करण्यासाठी हा व्हिडीओ ट्विट केल्याची माहिती पोलिस आयुक्त संजय बर्वे यांनी दिली. रुग्णालय आणि शाळा, तसेच मोहम्मद अली रोडसारख्या गजबजलेल्या रस्त्यांवर हा प्रयोग प्रथम राबविला जाईल. ध्वनिप्रदूषण आणि त्यामुळे होणारा त्रास कमी करण्यासाठी आमचे प्रयत्न सुरू असल्याचेही त्यांनी सांगितले.