या उत्तरामुळे मानुषी ठरली विश्वसुंदरी...

मटा ऑनलाइन वृत्त । मुंबई

‘आईला सर्वाधिक मान मिळायला हवा. त्यांना कॅशमध्ये पगाराऐवजी खूप सन्मान आणि प्रेम द्यायला हवं,’ मिस इंडिया मानुषी छिल्लर हिच्या या उत्तराने परीक्षकांसह उपस्थितांची मने जिंकली आणि अंतिम फेरीतील पाच सौंदर्यलतींमधून विश्वसुंदरीच्या मुकुटाचा मान तिला मिळाला. शनिवारी चीनमध्ये रंगलेल्या भव्य सोहळ्यात मानुषीने आपण ‘ब्युटी विथ ब्रेन्स’ असल्याचे सिद्ध केले.

टॉप ५ला गेल्यावर मिस इंडिया मानुषीला, ‘सर्वाधिक पगार कुणाला मिळायला हवा?’ असा प्रश्न विचारण्यात आला. त्यावर तिने आपल्या उत्तराने बाजी मारली. हा किताब पटकावल्यानंतर तिने टि्वट करून सर्वांचे आभार मानले आहेत. 'सर्वांचे धन्यवाद. तुमचं प्रेम, प्रार्थना आणि पाठिंब्यामुळेच हे शक्य झालं,' असं सांगत तिने हा पुरस्कार भारताला अर्पण केला आहे.
Thank you, everyone, for your constant love, support at prayers! @feminamissindia @MissWorldLtd #MissWorld2017 This one's for #India pic.twitter.com/kcnLV4C22P — Manushi Chhillar (@ManushiChhillar) November 18, 2017
मिस वर्ल्डच्या अंतिम फेरीत प्रवेश केल्यानंतर मानुषीने इन्स्टाग्रामवर एक पोस्ट टाकत तिच्या भावना व्यक्त केल्या होत्या. आज मिस वर्ल्ड फिनाले आहे. त्यात मी भाग घेत असून मी खूप आनंदी आहे, असं तिनं म्हटलं होतं.

याआधी प्रियांका चोप्रा, युक्ता मुखी, डायना हेडन आणि ऐश्वर्या राय यांनी मिस वर्ल्डचा किताब पटकावला होता. भारताने आतापर्यंत सहा वेळा हा किताब पटकावला आहे. त्यामुळे सर्वाधिक वेळा मिस वर्ल्डचा किताब पटकावणाऱ्या देशांच्या यादीत भारताचा समावेश झाला आहे.

मानुषी छिल्लर

शाळा : सेंट थॉमस स्कूल,

नवी दिल्ली

कॉलेज : भगत फूल सिंह गव्हर्न्मेंट

मेडिकल कॉलेज फॉर विमेन, सोनीपत

छंद : नृत्य, पेंटिंग, गायन