शिवसेनेविरोधात 'ई' प्रचार मोहीम

मटा ऑनलाइन वृत्त । मुंबई

देशाची आर्थिक राजधानी असलेल्या मुंबईची महापालिका ताब्यात घेण्यासाठी सर्वच राजकीय पक्षांनी कंबर कसली असून निवडणुकीच्या तारखा घोषित होण्याआधीच छुप्या प्रचाराला सुरुवात झाली आहे. मुंबई महापालिकेतील मुख्य सत्ताधारी शिवसेना या प्रचाराचं लक्ष्य ठरली आहे. शिवसेनेच्या कारभारावर हल्ला करणारे सचित्र 'ई' मेल सध्या मुंबईकरांना पाठवले जात असून त्याचा सूत्रधार पडद्याआड असल्यानं तर्कवितर्कांना उधाण आलं आहे.

'टॅक्सपेयर मुंबईकर' या नावानं मुंबईकरांच्या मेल बॉक्समध्ये सध्या रोजच्या रोज काही ई-मेल धडकत आहेत. त्या माध्यमातून मुंबईकर मतदारांना एक फोटो पाठवला जात आहे. त्यात मुंबईच्या बकाल अवस्थेकडं बोट दाखवणारं शिवसेनेचे पक्षप्रमुख उद्धव ठाकरे यांचं व्यंगचित्र आहे. गेल्या पाच वर्षांत आम्ही हे 'करून दाखवलं' असं उद्धव सांगत असल्याचं फोटोत दाखवण्यात आलं आहे.

मुंबई महापालिकेच्या मागील निवडणुकीत शिवसेनेनं 'करून दाखवलं' हे घोषवाक्य वापरून आक्रमक प्रचार केला होता. या प्रचाराचा शिवसेनेला प्रचंड फायदा झाला होता. आता त्याच घोषवाक्याचा वापर शिवसेनेच्या विरोधात केला जात आहे. बेकायदा झोपड्या, तुंबलेली मुंबई दाखवून आम्ही हे 'करून दाखवलं' अशी उपरोधिक टीका शिवसेनेवर करण्यात आली आहे. यामागे नेमकं कोण आहे, हे मात्र अद्याप गुलदस्त्यात आहे.



मैदानात येऊन लढा!: शिवसेना

शिवसेनेच्या विरोधातील या छुप्या प्रचाराला फारसं महत्त्व देण्याची गरज नाही, अशी प्रतिक्रिया शिवसेनेच्या प्रवक्त्या, आमदार डॉ. नीलम गोऱ्हे यांनी दिली आहे. 'जे लोक बुरखा घालून बाण मारताहेत, त्यांना जनता फार गंभीरपणे घेणार नाही. टीका करायचीच असेल, तर जाहीरपणे करा. मैदानात येऊन लढा. आम्ही उत्तर द्यायला तयार आहोत,' असं नीलम गोऱ्हे म्हणाल्या.