फ्री वेला विलासरावांचे नाव देण्याचा प्रस्ताव

म. टा. विशेष प्रतिनिधी, मुंबई : मुंबईतील पूर्व द्रुतगती महामार्गाला (ईस्टर्न फ्री वे) माजी मुख्यमंत्री दिवगंत विलासराव देशमुख यांचे नाव देण्यावर गुरुवारी शिक्कामोर्तब झाले. यासंदर्भातील आवश्यक ती कार्यवाही नगरविकास विभागाने पूर्ण केली असून, याबाबतचा प्रस्ताव मुंबई महापालिकेकडे पाठविला आहे. यामुळे काँगेसच्या नेत्यांची ही मागणी मान्य करीत मुख्यमंत्री उद्धव ठाकरे यांनी महाविकास आघाडीतील समतोल साधण्याचा प्रयत्न केला असल्याची चर्चा राजकीय वर्तुळात सुरू झाली आहे.

फ्री वेची लांबी १६.८ किमी असून, तो दक्षिण मुंबईतील पी. डिमोलो मार्गापासून चेंबूरपर्यंत जातो. हा रस्ता सध्या मुंबई महापालिकेच्या ताब्यात आहे. दिवंगत विलासराव देशमुख यांनी मुख्यमंत्री म्हणून मुंबईच्या विकासाला दिलेली दिशा, तसेच या महामार्गाच्या उभारणीतील त्यांचे योगदान लक्षात घेऊन त्याला देशमुख यांचे नाव देण्याची सूचना काही दिवसांपासून काँग्रेसच्या आमदारांकडून केली जात होती. अखेर ती पूर्ण होत असल्याने त्यांच्याकडूनही समाधान व्यक्त केले जात आहे.