शिवसेनेतील अंतर्गत वाद उफाळला; तीन नगरसेवकांवर गुन्हा दाखल

मटा ऑनलाइन वृत्त । मुंबई

महापालिका निवडणुकीच्या तोंडावर शिवसेनेतील अंतर्गत वाद पुन्हा एकदा चव्हाट्यावर आला आहे. दहिसरमध्ये आचारसंहितेच्या काळात एका उद्यानाचे उद्घाटन केल्याची तक्रार शिवसेनेचे नगरसेवक अभिषेक घोसाळकर यांनी केल्यानंतर माजी महापौर डॉ. शुभा राऊळ, शीतल म्हात्रे व अवकाश जाधव या तीन शिवसेनेच्या नगरसेवकांविरुद्ध राज्य निवडणूक आयोगाने सोमवारी दहीसर पोलिस ठाण्यात गुन्हा दाखल केला आहे.

दहीसर येथील प्रभाग क्रमांक आठमध्ये शिवसेनेचे नगरसेवक डॉ. राऊळ, म्हात्रे आणि जाधव यांनी कर्मयोग उद्यानाचे उद्घाटन मुंबई महापालिका निवडणुकीची आचारसंहिता जाहीर झाल्यानंतर म्हणजे १४ जानेवारीला केल्याची तक्रार घोसाळकर यांनी निवडणूक आयोगाकडे केली होती. याप्रकरणी आयोगाने या तिन्ही नगरसेवकांना मागच्या आठवड्यात कारणे दाखवा नोटीस बजावण्यात आली होती.

शीतल म्हात्रे यांनी महिलांच्या सुरक्षिततेचा मुद्दा उपस्थित करत माजी आमदार विनोद घोसाळकर व अभिषेक घोसाळकर यांना लक्ष्य केले होते. याप्रकरणावरून मागील तीन वर्षांपासून घोसाळकर विरुद्ध म्हात्रे, राऊळ यांच्यात जोरदार वाद सुरू आहे. तिकीटवाटपानंतर हा वाद आणखी पेटणार असल्याचे सांगितले जाते.