मुंबईतील शिक्षकांना होणार आर्थिक फायदा

निवडश्रेणी प्रशिक्षणाला पाच वर्षांनंतर मुहूर्त

म. टा. प्रतिनिधी, मुंबई

शिक्षकांची निवडश्रेणी प्रशिक्षणासाठीची पाच वर्षांपासूनची प्रतीक्षा अखेर संपली आहे. शिक्षक परिषदेसह इतर अनेक संघटनांच्या प्रयत्नांनी हे प्रशिक्षण सुरू करण्यात आले असून, या निर्णयामुळे मुंबईतील शिक्षकांना मोठा दिलासा मिळाला आहे.

राज्यातील पदवीधर शिक्षकांना वरिष्ठ व निवडश्रेणीचे प्रशिक्षण देण्याची जबाबदारी जिल्हा शिक्षण व प्रशिक्षण संस्थेकडे (डायट) देण्यात आली आहे. परंतु मुंबई व उपनगरांमध्ये ‘डायट’ नसल्याने मुंबईतील शेकडो शिक्षक वरिष्ठ व निवडश्रेणीपासून वंचित होते. याबाबत शिक्षक परिषद, शिक्षक भारती व इतर अनेक संघटनांनी शिक्षण विभागाकडे निवडश्रेणीचे प्रशिक्षण आयोजित करण्याची मागणी केली होती. शिक्षक परिषदेच्या आमदारांनी २७ जुलै २०१६ रोजी विधान परिषदेत औचित्याचा मुद्दा उपस्थित करून राज्य शैक्षणिक संशोधन व प्रशिक्षण परिषदेकडे प्रशिक्षणाची मागणी केली.

शालेय शिक्षणमंत्री विनोद तावडे यांनी शिक्षक परिषदेचे अनिल बोरनारे व शिक्षक परिषदेच्या शिक्षक आमदारांच्या पाठपुराव्याची दखल घेऊन शिक्षकांच्या सोयीने मुंबईतील शिरोडकर अध्यापक विद्यालयात शिक्षकांचे सेवांतर्गत प्रशिक्षण आयोजित करण्यात येईल, असे आश्वासन दिले होते. त्यानुसार मुंबईतील सेवांतर्गत प्रशिक्षणापासून वंचित असलेल्या शिक्षकांसाठी प्रशिक्षणाचे आयोजन करण्यात आले आहे.