आदित्य चोप्रा यांना ‘ईडी’चे समन्स

स्वामित्व हक्काची रक्कम बुडवल्याचे प्रकरण

म. टा. प्रतिनिधी, मुंबई

स्वामित्व हक्काची रक्कम बुडवल्याप्रकरणी ‘ईडी’ने मागील आठवड्यात पाच नामांकित म्युझिक कंपन्यांच्या मुंबई, दिल्ली आणि कोलकाता येथील कार्यालयांवर छापे टाकले होते. या प्रकरणी ‘ईडी’ने आता संबंधित कंपन्यांच्या संचालकांना समन्स धाडले असून, चौकशीसाठी हजर राहण्यास सांगितले आहे. आदित्य चोप्रा, देवराज संन्याल यांनाही हे समन्स बजावल्याने बॉलिवूड हादरले आहे.

सन २०१५मध्ये स्वामित्व हक्क कायद्याच्या उल्लंघनप्रकरणी इंडियन परफॉर्मिंग राइट सोसायटी (आयपीआरएस) आणि फोनोग्राफिक परफॉर्मन्स लिमिटेड (पीपीएल) यांच्यावर ‘ईडी’ने गुन्हा नोंदवला होता. फोनोग्राफिक परफॉर्मन्स लिमिटेडकडे (पीपीएल) स्टेज परफॉर्मन्स व रेडिओद्वारे वाजवली जाणारी गाणी असे सात लाख प्रकरणांचे हक्क देण्यात आले होते. मात्र, गीतकार आणि संगीतकारांना स्वामित्व हक्काचे पैसे मिळत नसल्याचा आरोप अनेकांनी केला होता. तसेच, अनेक प्रकरणांमध्ये स्वामित्व हक्काचे पैसे थेट म्युझिक कंपन्या घेत होत्या. मात्र, ती रक्कम संगीतकार व गीतकारांना दिली जात नव्हती. याप्रकरणी ज्येष्ठ गीतकार जावेद अख्तर यांनी तक्रार केली होती. त्यानंतर आयपीआरएस व पीपीएल यातील अनियमिततेबाबत ‘ईडी’ने गुन्हा दाखल केला होता.

त्यानुसार प्रसिद्ध निर्माता-दिग्दर्शक आदित्य चोप्रा यांच्यासह सोनी म्युझिक इंडियाचे उपाध्यक्ष श्रीधर सुब्रमण्यम, युनिव्हर्सल म्युझिकचे देवराज संन्याल यांनाही कोट्यवधी रुपयांच्या रॉयल्टी घोटाळ्याप्रकरणी स्पष्टीकरण देण्यासाठी ‘ईडी’ने बोलावले आहे. दरम्यान, या प्रकरणाशी संबंधित असलेल्या हँकोस कंपनीचे प्रतिनिधी येत्या दोन दिवसांत कागदपत्रांसह ईडी कार्यालयात उपस्थित राहणार असल्याचे सूत्रांनी सांगितले. टी-सीरीजचे व्यवस्थापकीय संचालक भूषण कुमार आणि 'सारेगम'चे विक्रम मेहरा यांचा जबाब नोंदविल्यानंतर हे पाऊल उचलण्यात आल्याचं ईडीचे म्हणणे आहे.