खडसेंना मोदी-शहा भेट दूरच

मटा ऑनलाइन वृत्त । मुंबई

पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांच्याकडे आपलं गाऱ्हाणं मांडावं म्हणून दिल्ली मुक्कामी गेलेले भाजप नेते एकनाथ खडसे यांच्या हाती काहीही लागलेलं नाही. पंतप्रधानांनी खडसे यांना भेट नाकारल्याचे वृत्त असून खडसेंनी रिकाम्या हातांनी मुंबईची वाट धरली आहे, अशी माहिती सूत्रांनी दिली.

पुणे-भोसरी येथील एमआयडीसी भूखंड खरेदी प्रकरण, सिंचन घोटाळाप्रकरणी झालेले आरोप आणि अंडरवर्ल्ड डॉन दाऊद इब्राहिम याच्याशी कथित संभाषण अशा अनेक आरोपांच्या कचाट्यात अडकल्याने खडसे यांना मंत्रिपद गमवावं लागलं. आधी राजीनामा देणार नाही, असा पवित्रा घेणाऱ्या खडसे यांना पक्षश्रेष्ठींच्या आदेशाने खुर्ची सोडावी लागली. खडसेंच्या राजीनाम्यानंतर त्यांच्यावर झालेल्या आरोपांची हायकोर्टाच्या निवृत्त न्यायाधीशांमार्फत चौकशी केली जाणार आहे. असे असतानाच वरिष्ठांचं मतपरिवर्तन करण्यासाठी खडसे अचानक दिल्लीत दाखल झाले होते. पंतप्रधान मोदी आणि पक्षाध्यक्ष शहा यांची ते भेट घेणार आहेत, अशा बातम्या होत्या. मात्र केंद्रीय मंत्री नितीन गडकरी वगळता भाजपच्या एकाही केंद्रीय नेत्याची भेट खडसे यांना मिळू शकली नाही, असे सूत्रांचे म्हणणे आहे.

पंतप्रधान नरेंद्र मोदी पाच देशांचा दौरा आटोपून आज सकाळीच भारतात परतले. खडसे त्यांच्या भेटीसाठी प्रयत्न करत होते पण तिथूनही खडसेंच्या पदरात निराशा पडली. त्यामुळे खडसेंनी परतीची वाट धरल्याचे सूत्रांनी सांगितले.