उमेदवारांची कुंडली मतदान केंद्राबाहेर झळकणार

मटा ऑनलाइन वृत्त । मुंबई

तुमच्या उमेदवारांवर किती गुन्हे आहेत?, तो धुतल्या तांदळासारखा आहे का? हे जाणून घेण्यासाठी राजकारण्यांचे आरोप-प्रत्यारोप ऐकण्याची गरज नाही. या उमेदवारांची कुंडली जाणून घेण्यासाठी आरटीआय टाकण्याचीही गरज नाही. मतदानाच्याच दिवशी तुम्हाला तुमच्या उमेदवारांच्या गुन्हेगारीची कुंडली पाहायला मिळणार आहे. उमेदवाराच्या गुन्हेगारी कारवायांचा तपशीलच मतदान केंद्राबाहेर झळकविण्याचा निर्णय राज्य निवडणूक आयोगानं घेतला आहे.

ज्याला मतदान करायचं, त्या उमेदवाराची गुन्हेगारी पार्श्वभूमी मतदारांना कळावी म्हणून मतदान केंद्राबाहेर उमेदवारांच्या संपत्तीसह त्याच्या गुन्हेगारीचा तपशीलही लावण्याचा निर्णय राज्य निवडणूक आयोगानं घेतला आहे. त्यामुळे कोणत्या उमेदवारांवर कोणते आणि किती गुन्हे आहेत, हे मतदारांना कळणार असून योग्य उमेदवारालाच मतदान करता येणार आहे. मुंबई, ठाणे, पुणे, नाशिक, नागपूर, सोलापूर, पिंपरी-चिंचवड, अमरावती, अकोला आणि उल्हासनगर या दहा महापालिकांसाठी २१ फेब्रुवारी रोजी मतदान होणार असून २३ तारखेला निकाल जाहीर होणार आहेत. त्यामुळे या महापालिकांच्या मतदानावेळीच हा प्रयोग राबविण्याचा निर्णय आयोगानं घेतला आहे. मतदार या निर्णयाचं स्वागतच करतील, अशी आशा आयोगानं व्यक्त केली आहे.