महावितरणला मिळेना स्वस्त सौरऊर्जा; अखेर ३.३० रुपये युनिटने वीजखरेदी केली जाणार

म. टा. खास प्रतिनिधी, मुंबई : महावितरणला स्वस्त सौरऊर्जा मिळण्यात अडचणी येत आहेत. त्यासाठी काढलेल्या निविदेला प्रतिसाद मिळाला नाही. त्यामुळेच कंपनीने मुख्यमंत्री सौर कृषी वाहिनीसाठी केवळ एका निविदा अर्जाला मंजुरी घेतली. त्याअंतर्गत १५० मेगावॉट वीज ३.३० रुपये प्रतियुनिट दराने वीजखरेदी केली जाणार आहे.

राज्यात जवळपास ४५ लाख कृषी वीजग्राहक आहेत. या सर्वांना महावितरणकडून वीजपुरवठा होतो. मात्र कृषी वीजपुरवठ्याचा दर माफक आहे. त्यातही अनेक ठिकाणी देयक वसुली होत नाही. त्यामुळेच सर्व कृषीपंपांना सौर आधारित वीजपुरवठा करण्याचे धोरण आखण्यात आले आहे. यासाठी मुख्यमंत्री सौर कृषी वाहिनी योजना कार्यान्वित आहे.

महावितरणने या योजनेअंतर्गत २३० मेगावॉट सौर वीजपुरवठ्यासाठी निविदा काढली होती. त्यामध्ये ३.१० रुपये प्रतियुनिट हा कमाल दर निश्चित झाला होता. मात्र या कमाल दराने वीजपुरवठा करण्यासाठी पुरवठादारांनी प्रतिसाद दिला नाही. त्यामुळे महावितरणने कमाल मर्यादा वगळून पुन्हा निविदा काढली. त्यावेळी दोन पुरवठादारांनी ४ व ४.१० रुपये प्रतियुनिट दराने वीज देण्याची तयारी दर्शवली. मात्र हा दर अधिक असल्याने कंपनीने पुन्हा निविदा काढली. त्यावेळी ‘नॅशनल फेडरेशन ऑफ फार्मर्स प्रोक्यूरमेंट प्रोसेसिंग अॅण्ड रिटेलिंग को-ऑपरेटिव्ह्स ऑफ इंडिया लिमिटेड’ यांनीच केवळ निविदेला प्रतिसाद दिला.

औषधांअभावी फरफट; मुंबई पालिका रुग्णालयातील रुग्णांचे औषध तुटवड्यामुळे हाल

त्यांनी १५० मेगावॉट सौरऊर्जा ३.३० रुपये प्रतियुनिट दराने पुरविण्याची तयारी दर्शवली आहे. त्यानुसार कंपनीने महाराष्ट्र वीज नियामक आयोगाकडे परवानगीसाठी याचिका दाखल केली. आयोगाने ही याचिका मंजूर केली आहे.