- मुंबई महानगर क्षेत्रात ५२०० जागा वाढल्या
- ठाणे विभागात ३६०० जागांची वाढ
म. टा. विशेष प्रतिनिधी, मुंबई
अकरावीच्या ऑनलाइन प्रवेशप्रक्रियेत यंदा ३५ नवीन ज्युनिअर कॉलेजे सहभागी झाली आहेत. मुंबई महानगर क्षेत्रात ८४९ कॉलेजांनी मुंबई उपसंचालक विभागाकडे नोंदणी केली असल्यामुळे यंदा तिन्ही शाखांमधील ५२०० जागा वाढल्या आहेत. यात ठाणे विभागात ३६०० इतक्या सर्वाधिक जागा दिल्या आहेत.
दहावीचे निकाल लागल्यानंतर अकरावीच्या ऑनलाइन प्रवेशाची प्रक्रिया सुलभ व्हावी, यासाठी मुंबई शिक्षण उपसंचालक कार्यालयाकडून मुंबई, ठाणे, कल्याण, डोंबिवली, नवी मुंबई, अंबरनाथ आणि पनवेलमधील कनिष्ठ कॉलेजांना १५ मेपर्यंत नोंदणी करणे बंधनकारक केले होते. उपसंचालक कार्यालयाने सुरू केलेल्या नोंदणी शिबिराला सुरुवातीला अल्प प्रतिसाद मिळाला; मात्र अखेरच्या पाच दिवसांत कॉलेजांनी मोठ्या संख्येने नोंदणी केली. मुंबई महानगर प्रदेशात २५ मेपर्यंत चाललेल्या प्रक्रियेत तब्बल ८४९ कॉलेजांनी मुंबई शिक्षण उपसंचालक कार्यालयाकडे नोंदणी केली. त्यामध्ये मागील वर्षीची ८१४ कॉलेजे असून, या वर्षी ३५ नव्या कॉलेजांची भर पडली आहे. त्यामुळे या वर्षी अकरावीच्या प्रवेशासाठी ५२०० जागा जास्त उपलब्ध झाल्या आहेत. यात कला शाखेसाठी १०४०, विज्ञान शाखेसाठी २१६० तर वाणिज्य शाखेसाठी दोन हजार जागा वाढल्या आहेत. ३५ नव्या कॉलेजांमध्ये २० नवी कॉलेजे ठाण्यात असणार आहेत. यामुळे यंदा ठाणे जिल्ह्यातील विद्यार्थ्यांना शिक्षणासाठी जिल्ह्याबाहेर जाण्याची आवश्यकता भासणार नाही, असे मत व्यक्त होत आहे.
..
एमएमआर क्षेत्रातील नवीन कॉलेजे व जागा
विभाग एकूण कॉलेजे शाखानिहाय तुकड्या शाखानिहाय जागा
कला - विज्ञान - वाणिज्य कला - विज्ञान - वाणिज्य
दक्षिण २ ० २ ० ० १६० ०
उत्तर ५ ० ४ २ ० ३२० १६०
पश्चिम ७ १ ५ ५ ८० ४०० ४००
ठाणे २० १२ १५ १८ ९६० १२०० १४४०
पनवेल १ ० १ ० ० ८० ०
...
प्रवेशासाठी उपलब्ध होणाऱ्या जागा
कला - ३६,३६०
वाणिज्य - १,६७,३३०
विज्ञान - ९६,९३०