पोलः ९५% म्हणतात, बुलेट ट्रेन नको सुविधा द्या

मटा ऑनलाइन वृत्त । मुंबई

एल्फिन्स्टन स्थानकाच्या पुलावरील चेंगराचेंगरीत २३ जणांचा नाहक बळी गेला. या घटनेनंतर लोकलने प्रवास करणाऱ्यांमध्ये रेल्वे प्रशासनाविरोधात प्रचंड संताप आणि नाराजी आहे. या घटनेवर मटा ऑनलाइनने ट्विटरवर केलेल्या पोलमधूनही लोकांनी आपला संताप व्यक्त केला आहे.

मुंबईतील रेल्वेपूल दुर्घटनेनंतर सरकारने पहिले प्राधान्य कशाला द्यायला हवे? असा प्रश्न आम्ही ट्विटरवर केला होता. या प्रश्नासोबत पायाभूत सुविधा, लोकलची संख्यावाढ आणि बुलेट ट्रेन असे तीन पर्याय दिले होते. यापैकी पायाभूत सुविधांसाठी सर्वाधिक ८५ टक्के जणांनी मत मांडलं आहे. तसंच लोकलची संख्यावाढ करण्यासाठी १० टक्के लोकांनी मत दिलं. तर बुलेट ट्रेन या तिसऱ्या पर्यायाला फक्त ५ टक्के मतदारांची पसंती मिळाली. यामुळे मुंबईकरांमध्ये असलेला बुलेट ट्रेनचाविरोध अधिक ठळकपणे समोर आला आहे.

मुंबईतील रेल्वेपूल दुर्घटनेनंतर सरकारने पहिले प्राधान्य कशाला द्यायला हवे?#Elphinstone — maharashtratimes.com (@mataonline) September 29, 2017

एल्फिन्स्टनच्या चेंगराचेंगरीच्या घटनेने मुंबईसह लोकलने प्रवास करणाऱ्या प्रत्येक चाकरमान्याने हळहळ व्यक्त केली. दुर्देवं म्हणजे ऐन दसऱ्याच्या तोंडावर ही घटना दुःखद घटना घडली. यामुळे रेल्वे प्रशासनाविरोधात रोष वाढला आहे. आता तरी रेल्वेने तातडीने पावलं उचलून मुंबईतील पायाभूत सुविधांवर अधिकाधिक भर द्यावा, अशी आग्रही मागणी केली प्रवाशांकडून होतेय.