बोनस मिळाला; बेस्ट कर्मचाऱ्यांचा संप मागे

मटा ऑनलाइन वृत्त। मुंबई

बोनसच्या मागणीवरून बेस्ट कर्मचाऱ्यांनी भाऊबिजेच्या दिवशी पुकारलेला नियोजित संप मागे घेण्यात आला आहे. महापौर विश्वनाथ महाडेश्वर यांच्याशी झालेल्या बैठकीनंतर हा निर्णय घेण्यात आला. महापौरांसोबत झालेल्या बैठकीत बेस्ट कर्मचाऱ्यांना सुधारणा करण्याच्या अटींवर ५ हजार ५०० रुपये इतकी आगाऊ रक्कम देण्याचा निर्णय घेण्यात आला. सुधारणा झाल्यास ही रक्कम बोनस म्हणून गणली जाणार आहे. मात्र सुधारणांची प्रक्रिया सुरू न झाल्यास दिवाळीसाठी दिलेली ही रक्कम आगाऊ समजून प्रचलित नियमाप्रमाणे ती नंतर वसून केली जाईल असेही बैठकीत स्पष्ट करण्यात आले आहे.

बेस्टची आर्थिक स्थिती अत्यंत बिकट असल्याने बेस्ट सध्या बोनस देण्याच्या स्थितीत नाही. कायदेशीर अडचणींमुळे महापालिकेलाही बेस्टला थेट मदत करण्यात अडचणी आहेत. हे लक्षात घेत बोनसऐवजी तेवढीच रक्कम आगाऊ स्वरूपात (Advance) कर्ज म्हणून, सुधारणा करण्याच्या अटींवर बेस्टला देण्यास तयार असल्याचे महापालिकेने स्पष्ट केले आहे. बेस्ट ही रक्कम आपल्या कर्मचाऱ्यांना आगाऊ रक्कम म्हणूनच देणार आहे.

आवश्यक त्या सुधारणा करणे सुरू झाल्यानंतर ही आगाऊ रक्कम बोनस म्हणूनच गणली जाईल असे महापालिकेने स्पष्ट केले आहे. मात्र सुधारणांची प्रक्रिया सुरूच झाली नाही, तर ही रक्कम दिवाळीसाठी दिलेली आगाऊ रक्कम असल्याचे समजण्याच येईल आणि विशेष म्हणजे नंतर ती वसून केली जाईल असे महापालिकेने स्पष्ट केले आहे.