कंत्राटदारांकडील श्रमिकांचा तुटवडा भरून काढण्यासाठी पुढाकार
नियुक्त केलेल्या कंत्राटदारांना संपर्क करण्याचे आवाहन
अकुशल कामगारांना एक महिन्याचे प्रशिक्षण देणार
prathmesh.rane@timesgroup.com
Tweet : @PrathmeshRaneMT
मुंबई : लॉकडाउननंतर मुंबईतील हजारो श्रमिक आपल्या मूळगावी परतल्याने, कंत्राटदारांना श्रमिकांचा तुटवडा जाणवत असून त्याचा परिणाम शहरातील पायाभूत सुविधा उभारणीवर होत असल्याचे मुंबई महानगर प्रदेश विकास प्राधिकरणाने (एमएमआरडीए) स्पष्ट केले होते. हा तुटवडा भरून काढण्यासाठी एमएमआरडीएने पुढाकार घेतला असून कंत्राटदारांमार्फत राज्यातील कुशल, अकुशल कामगारांसाठी तब्बल १६ हजारांहून अधिक रोजगाराच्या संधी उपलब्ध केल्या आहेत. यामध्ये गवंडी, सुतारकाम, फिटर (स्टील आणि बार फिक्सिंग), वेल्डर, इतर (वायरमन) आणि अकुशल कामगार अशा सात विभागांत या जागा उपलब्ध करण्यात आल्या आहेत.
करोनाचे संकट अधिक गडद होऊ लागल्यानंतर देशभरात संचारबंदी लागू करण्यात आली. मात्र या कालावधीत वाढ झाल्यानंतर अनेक श्रमिकांनी विविध मार्गांनी मुंबई सोडण्यास सुरुवात केली. परिणामी मुंबई महानगर क्षेत्रातील मेट्रो प्रकल्पांसह विविध विकासकामांना ब्रेक लागण्यास सुरुवात झाली असून कंत्राटदारही चिंतेत आहेत. यामुळे एमएमआरडीएतर्फे सात विभागांमध्ये एकूण १६,७२६ जागांसाठी जाहिरात प्रसिद्ध करण्यात आली आहे. यामध्ये स्थापत्य कामांत मुख्यत्वे पाया उभारणी, मेट्रो खांबांची उभारणी, उन्नत मार्गाचे बांधकाम, मेट्रो स्थानकांच्या सजावटीसाठी लादी बसविणे व इतर कामांचा समावेश आहे. या कामांसाठी लोखंडी सळीची बांधणी (फिटर्स), ढाच्याची बांधणी करण्यासाठी (कारपेंटर्स) तसेच काँक्रीट करण्यासाठी कुशल कामगारांची गरज आहे.
खोदकाम, साफसफाई व इतर कामांसाठी अकुशल कामगारांची आवश्यकता भासणार आहे. या जागांसाठी श्रमिकांनी एमएमआरडीएतर्फे नियुक्त करण्यात आलेल्या कंत्राटदारांना संपर्क साधायचा आहे. या जागांसाठी निवड झालेल्या श्रमिकांची व्यवस्था कंत्राटदारांमार्फत करण्यात येईल. तसेच आवश्यक अर्हता, अनुभव नसलेल्या अकुशल कामगारांना एक महिन्याचे प्रशिक्षण देण्यात येणार असल्याचे स्पष्ट करण्यात आले आहे. याबाबतची सविस्तर माहिती लवकरच अधिकृत संकेतस्थळावर जाहीर करण्यात येईल. मात्र कंत्राटदारांसोबत संपर्क न झाल्यास प्राधिकरणाच्या ०२२-२६५९१२४१/२६५९४१७६ किंवा ८६५७४०२०९० या क्रमांकावर संपर्क साधण्याचे आवाहन करण्यात आले आहे.
लॉकडाउननंतर श्रमिकांची कमतरता भासू नये याकरिता एमएमआरडीए प्रशासनाने विविध प्रकल्पांमध्ये काम करणाऱ्या जवळपास ११ हजार श्रमिकांचा संपूर्ण खर्च उचलण्याचे ठरविले. तसेच श्रमिक छावण्या उभारत त्यांच्या राहण्याची आणि जेवणाची व्यवस्था केली. त्यामुळे २५ एप्रिलपर्यंत हे कामगार छावणीतच वास्तव्यास होते. त्यानंतर काही काळ प्रकल्पांचे दिवस-रात्र काम सुरू करण्यात आले. मात्र विशेष श्रमिक रेल्वे आणि राज्य हद्दीत बससेवा उपलब्ध झाल्यानंतर एमएमआरडीएच्या विविध प्रकल्पांमध्ये काम करणारे शेकडो कामगार निघून गेल्याची माहिती एका अधिकाऱ्याने दिली.
उपलब्ध जागा
गवंडी : २७४
सुतारकाम : २,६७८
फिटर (स्टील फिक्सिंग) : ३६६
फिटर (बार फिक्सिंग) : ३,३५९
वेल्डर : ४२३
इतर (वायरमन) : २,१६७
अकुशल कामगार : ७,४५९
श्रमिकांचा तुटवडा लक्षात आल्यानंतर राज्यातील तरुण बेरोजगारांना रोजगाराच्या संधींबाबत माहिती देण्याचे निर्देश मुख्यमंत्र्यांनी दिले होते. त्यानुसार वर्तमानपत्रातून आम्ही जाहिरात देत आहोत. इच्छुक तरुणांसाठी कंत्राटदारांचे संपर्क क्रमांक जाहिरातीत देण्यात आले आहेत. कंत्राटदारांच्या प्रतिनिधींशी संपर्क न झाल्यास प्राधिकरणाच्या दूरध्वनी क्रमांकावर संपर्क साधण्याचा पर्याय देण्यात आला आहे.
- आर. ए. राजीव, आयुक्त, एमएमआरडीए