'चकमक'फेम प्रदीप शर्मा आज शिवसेनेत; नालासोपाऱ्यातून लढणार

मुंबई: 'एन्काउंटर स्पेशालिस्ट' अशी ओळख असलेले मुंबई पोलीस दलातील माजी अधिकारी प्रदीप शर्मा राजकारणाच्या आखाड्यात उतरणार आहेत. ते आज शिवसेनेत प्रवेश करणार आहेत. नालासोपारा विधानसभा मतदारसंघातून ते निवडणूक लढण्याची शक्यता आहे.

१९८३ साली पोलीस सेवेत रूजू झालेले प्रदीप शर्मा हे घाटकोपर आणि माहीम ही दोन पोलीस ठाणी वगळता बहुतांश काळ मुंबई गुन्हे शाखा आणि स्पेशल टास्क फोर्समध्येच कार्यरत होते. पोलिस दलात सर्वाधिक एन्काऊंटर करण्याची कामगिरी शर्मा यांच्याच नावावर आहे. त्यात मुंबई बॉम्बस्फोटातील 'लष्कर-ए-तोयबा'च्या तीन अतिरेक्यांसह सादिक काल्या, विनोद मटकर, सुहास माकडवाला, रफीक डबा अशा अनेक कुख्यात गुंडांचा समावेश आहे. महिनाभरापूर्वीच त्यांनी पोलीस सेवेचा राजीनामा दिला होता. त्यानंतर ते शिवसेनेच्या माध्यमातून राजकारणात प्रवेश करणार असल्याची चर्चा होती. ती खरी ठरली आहे.

शर्मा आज सायंकाळी शिवसेनेत प्रवेश करणार आहेत. वसई-विरार भागातील हितेंद्र ठाकूर कुटुंबाची एकाधिकारशाही मोडून काढण्यासाठी शर्मा यांना नालासोपारा येथून क्षितीज ठाकूर यांच्याविरोधात रिंगणात उतरविले जाणार असल्याचं बोललं जात आहे.