म. टा. प्रतिनिधी, मुंबई
पद्मश्री डॉ. अमित मायदेव यांच्या संकल्पनेतली भारतातील पहिली फिरती वैद्यकीय व्हॅन; गरीब आणि गरजू रुग्णांसाठी पोटाच्या विकारांवर अद्ययावत दर्जाचे उपचार पुरवेल, असे मुख्यमंत्री उद्धव ठाकरे यांनी मंगळवारी येथे सांगितले. मंगळवारी विधानमंडळाच्या प्रांगणात महाराष्ट्र शासन आणि बलदोटा इन्स्टिट्यूट ऑफ डायजेस्टीव्ह सायन्स यांच्या संयुक्त विद्यमाने सुरू करण्यात येणाऱ्या 'एन्डोस्कोपी ऑन व्हिल्स' म्हणजेच फिरत्या पोटविकार उपचार केंद्राचे उद्घाटन ठाकरे यांच्या हस्ते करण्यात आले. वर्षभर ही व्हॅन राज्यभर फिरणार असून, या केंद्रात वैद्यकीय सोयीसुविधा मोफत मिळणार आहेत.
'पद्मश्री डॉ. अमित मायदेव यांच्या संकल्पनेतून साकारलेले 'एन्डोस्कोपी ऑन व्हिल्स' हे भारतातील अशाप्रकराचे पहिलेच केंद्र असून त्याची सुरुवात महाराष्ट्रातून होत आहे, ही बाब अभिमानास्पद आहे,' असे मुख्यमंत्री म्हणाले. संपूर्ण राज्यातील ग्रामीण आणि दुर्गम भागातील गरीब, गरजूंना अद्ययावत दर्जाचे वैद्यकीय उपचार मिळावेत, यासाठी हे फिरते वैद्यकीय केंद्र महाराष्ट्र शासन आणि बलदोटा इन्स्टिट्यूट यांच्या संयुक्त विद्यमाने सुरू करण्यात आले आहे.
'समाजाचे आपण देणे लागतो, त्यासाठी काहीतरी केले पाहिजे. या विचाराने सुरू झालेली ही संकल्पना आता प्रत्यक्षात उतरणार आहे. या फिरत्या केंद्रात अद्ययावत सोयी-सुविधांनी सज्ज ऑपरेशन थिएटर आहे. या गाडीत दोन तज्ज्ञ डॉक्टर आणि टेक्निशिअन असतील. एच-पायलोरी, कॅन्सरचे लवकर निदान, आतड्यांचे अल्सर, बायोप्सी, आतड्यांना सूज आली असेल तर त्याचे निदान, ॲसिडिटीची तपासणी या केंद्राच्या माध्यमातून करण्यात येईल, असे डॉ. मायदेव यांनी सांगितले.
ही सुविधा सुरू करण्यासाठी नरेंद्र कुमार बलदोटा परिवाराने देणगी देऊन पुढाकार घेतला आहे. या केंद्रातील संपूर्ण सुविधा विनामूल्य असेल. त्यामुळे पोटाचे विकार, त्याची कारणे व त्यावरील उपाय आणि उपचार याबाबत लोकांमध्ये या केंद्राच्या माध्यमातून जनजागृती करण्यात येणार आहे. एखाद्या प्रकरणात तज्ज्ञ डॉक्टरांचा सल्ला हवा असल्यास डॉ. मायदेव स्वत: गाडीवर उपलब्ध असणाऱ्या डॉक्टरांना मार्गदर्शन करतील. या गाडीचे प्रभारी म्हणून ग्लोबल रुग्णालयाचे संचालक डॉ. अमित मायदेव सर्व कामकाज पाहणार आहेत.
यावेळी विधानपरिषदेच्या उपसभापती डॉ. निलम गोऱ्हे, आ. आदित्य ठाकरे, माजी आ. कॅप्टन अभिजीत अडसुळ, मुख्यमंत्र्यांचे प्रधान सचिव विकास खारगे, बीआयडीएस केंद्राचे संचालक पद्मश्री डॉ. अमित मायदेव आदीसह अधिकारी कर्मचारी उपस्थित होते.