इंजिनीअरिंग सीईटी आता आणखी कठीण

पुढील वर्षी अंमलबजावणी उच्चशिक्षण विभागाचे आदेश

म. टा. प्रतिनिधी, मुंबई

राज्यातील इंजिनीअरिंग कॉलेजातील प्रवेशासाठी घेण्यात येणाऱ्या सीईटी परीक्षेच्या अभ्यासक्रमाची काठिण्य पातळी वाढविण्याची सूचना उच्च व तंत्रशिक्षण विभागाने केली आहे. या अभ्यासक्रमाचा दर्जा आता केंद्रीय पातळीवर घेण्यात येणाऱ्या जेईईप्रमाणे करण्याची सूचनाही यावेळी करण्यात आली आहे. हा बदल यंदा होणार नसून २०१८-१९ या शैक्षणिक वर्षापासून त्याची अंमलबजावणी होईल.

राज्यातील इंजिनीअरिंग आणि फार्मसी अभ्यासक्रमाच्या प्रवेशासाठी येत्या शैक्षणिक वर्षापासून राज्य पातळीवर एकच सीईटी ही सामायिक परीक्षा घेण्यात येणार आहे. गेल्या वर्षी या परीक्षेतील अभ्यासक्रमाच्या गोंधळामुळे बरीच टीका उच्च व तंत्रशिक्षण विभागाला सहन करावी लागली होती. त्यामुळे याची गंभीर दखल घेत उच्च व तंत्रशिक्षण विभागाने नुकताच या संदर्भात सरकार निर्णय जाहीर करीत या सूचना केल्या आहेत.

यंदा इंजिनीअरिंग तसेच इतर व्यावसायिक अभ्यासक्रमाच्या सामायिक प्रवेश परीक्षांचा अभ्यासक्रम व त्याची काठिण्य पातळी नीट आणि जेईईसारख्या राष्ट्रीय स्तराच्या तोडीची केल्यास आपल्या राज्यातील विद्यार्थी सक्षम होतील हा विचार करून उच्च व तंत्रशिक्षण विभागाने शालेय शिक्षण विभागाला बारावीच्या अभ्यासक्रमांवर होणाऱ्या राज्य सीईटी अभ्यासक्रमांचा पॅटर्न बदलण्याची सूचना केली आहे. सीईटीसाठी लागणाऱ्या अभ्यासक्रमांचा समावेश करून त्याबाबतची जनजागृती करावी, असेही या संदर्भातील काढलेल्या शासन निर्णयात म्हटले आहे. केंद्र आणि राज्यस्तरावील सीईटी परीक्षांचा समान अभ्यासक्रम असल्यास विद्यार्थ्यांना स्वतंत्रपणे तयारी करावी लागणार नाही. तसेच, राज्यातील विद्यार्थी राज्याच्या सीईटीसह राष्ट्रीय स्तरावरील जेईई परीक्षेसाठी प्रोत्साहन मिळेल, असे या निर्णयाचे स्पष्टीकरण केले आहे.