...आता डॉक्टरांना माफी नाही!- मुख्यमंत्री

मटा ऑनलाइन वृत्त । मुंबई

सुरक्षेची हमी आणि इतर सगळ्या मागण्या मान्य करायला सरकार तयार असतानाही रुग्णांना वाऱ्यावर सोडणार असाल तर त्या डॉक्टरांना आम्ही माफ करणार नाही. 'इनफ इज इनफ', अशा सज्जड इशारा मुख्यमंत्री देवेंद्र फडणवीस यांनी सरकारी निवासी डॉक्टरांना दिला आहे.

अजूनही वेळ गेलेली नाही, तात्काळ कामावर दाखल व्हा. डॉक्टर म्हणून घेतलेली शपथ आठवा. आता रुग्णांना मरण्यासाठी सोडता येणार नाही. सरकार हातावर हात ठेवून बसणार नाही, असा आक्रमक पवित्रा मुख्यमंत्र्यांनी विधानसभेत घेतला.

डॉक्टरांना होणाऱ्या मारहाणीच्या निषेधार्थ राज्यभरातील निवासी डॉक्टरांनी बेमुदत रजा आंदोलन सुरू केल्यानं रुग्णांचे हाल होत आहेत. त्याची गंभीर दखल घेऊन, उच्च न्यायालयाने गुरुवारी डॉक्टरांना कामावर तातडीने रुजू होण्याचे निर्देश दिले होते. मात्र, त्यानंतरही डॉक्टरांनी माघार घेतलेली नाही. उच्च न्यायालयाने डॉक्टरांच्या सुरक्षेच्या संदर्भात कोणते लेखी निर्देश दिले आहेत व त्याची अंमलबजावणी कशी होणार आहे, हे पाहिल्याशिवाय कामावर रुजू होणार नाही, हीच भूमिका डॉक्टरांनी घेतली आहे. या अडमुठेपणावरून मुख्यमंत्र्यांनी त्यांची कडक शब्दांत कानउघाडणी केली.

मुख्यमंत्री म्हणाले,

>> राज्य सरकारला डॉक्टरांबद्दल आदर आहे. पण ते ज्या पद्धतीने वागत आहेत, ते पाहून आश्चर्य वाटतं. ते आपली शपथ विसरत आहेत. इतकी असंवेदनशीलता आली कुठून?

>> माणूस मरत असताना त्याला वाचवण्याऐवजी डॉक्टर आपल्या मागण्या पुढे रेटत आहेत.

>> एखादा पेशंट मृत्युमुखी पडत असेल, तर ड्युटीवर असतानाही उपचार नाकारणाऱ्या डॉक्टरवर निष्काळजीपणाचा गुन्हा का दाखल केला जाऊ नये?

>> जनतेकडून कररूपाने आलेल्या पैशातून डॉक्टरांच्या शिक्षणाचा खर्च केला जातो. उद्या जनतेचा संयम सुटला तर सरकार काय करणार?

>> डॉक्टरांचं सगळं म्हणणं सरकारने ऐकून घेतलंय. त्यांची सुरक्षेची मागणी मान्य केलीय आणि त्यावर कार्यवाहीही सुरू झालीय. तरीही, ते रुग्णांना वाऱ्यावर सोडणार असतील तर डॉक्टरांना माफ करणार नाही.

>> आज मी डॉक्टरांसोबत शेवटची बैठक घेणार आहे. मी त्यांना हात जोडून, पाया पडून विनंती करायलाही तयार आहे. त्याने माझा अवमान होत नाही. त्यांच्यात संवेदनशीलता असेल तर तोडगा निघेल. नाहीतर, सरकार हातावर हात ठेवून बसणार नाही. इनफ इज इनफ. जी कायदेशीर कारवाई करणं आवश्यक आहे, ती कारवाई केली जाईल.