विश्वकोशाच्या अॅपला उत्साही प्रतिसाद

अवघ्या दोन दिवसांत ५ हजार वाचकांकडून डाऊनलोड

म. टा. प्रतिनिधी, मुंबई

महाराष्ट्र राज्य मराठी विश्वकोश निर्मिती मंडळामार्फत प्रकाशित करण्यात आलेल्या विश्वकोशाचे २० खंड गेल्या आठवड्यात मोबाइल अॅपद्वारे वाचकांना उपलब्ध करून देण्यात आले आहे. या अॅपला वाचकांचा उत्साही प्रतिसाद लाभला असून अवघ्या दोन दिवसांमध्ये सुमारे ५ हजार वाचकांनी हे अॅप डाऊनलोड केले आहेत.

विश्वकोशाच्या खंडांच्या या अॅपचे वाई येथे झालेल्या कार्यक्रमात शुक्रवार १२ जानेवारी रोजी लोकार्पण करण्यात आले. त्यानंतर आतापर्यंत या अॅपवर १७६ वाचकांनी प्रतिक्रिया दिल्या आहेत तसेच याचे गुणवत्ता मानांकन ४.८ नोंदविण्यात आले आहे. बुकगंगा डॉट कॉमच्या माध्यमातून या अॅपची निर्मिती करण्यात आली आहे.

या अॅपमुळे जगभरातील लोकांच्या हातात मराठी विश्वकोशाचे खंड देणे शक्य झाले आहे. आधुनिक तंत्रज्ञानाचा वापर करून मराठी विश्वकोशाच्या २० खंडांतील माहिती या अॅपमध्ये समाविष्ट केली आहे. हे अॅप गुगल प्ले स्टोअरवरून विनामूल्य डाऊनलोड करता येत असून सध्या अॅन्ड्रॉइड आणि अॅपल या प्रमुख मोबाइलप्रणालींमध्ये हे अॅप वापरता येऊ शकते, अशी माहिती बुकगंगाचे मंदार जोगळेकर यांनी दिली. हे अॅप अधिकाधिक वाचकांनी डाऊनलोड करून मराठीच्या ज्ञानमर्यादा वाढवाव्यात, असे आवाहन मराठी विश्वकोश मंडळाचे अध्यक्ष दिलीप करंबेळकर यांनी केले आहे.