झोपड्यांवरील कारवाईला काँग्रेस, राष्ट्रवादीचा विरोध

व्होट बँकेसाठी धडपड

म. टा. खास प्रतिनिधी, मुंबई

महापालिका निवडणुकीचे घोडमैदान जवळ असल्याने प्रत्येक राजकीय पक्षाने आपली व्होट बँक जपण्याची धडपड सुरू केली आहे. काँग्रेस व राष्ट्रवादीही यात मागे नाही. दोन्ही पक्षांनी १४ फुटांपेक्षा अधिक उंचीचे बांधकाम केलेल्या झोपड्यांवर कारवाई करण्यास विरोध केला आहे.

मुंबईत झोपड्यांवर अवैध इमले वाढत असल्याने पालिकेने १४ फुटांपेक्षा अधिक उंचीच्या बांधकामावर कारवाई सुरू कली आहे. या पार्श्वभूमीवर राष्ट्रवादीचे मुंबईचे अध्यक्ष सचिन अहिर व गटनेते धनंजय पिसाळ यांनी पक्षाच्या नगरसेवकांसह गुरुवारी पालिका आयुक्तांची भेट घेतली. १४ फुटांवरील झोपड्यांच्या कारवाईस त्यांनी विरोध केला. दिवा, मुंब्र्यातील अवैध बांधकामांना तेथील पालिकांनी संरक्षण दिले आहे. त्याच धर्तीवर मुंबईतही दिले जावे, असे अहिर यांनी सांगितले. या बांधकामांच्या उंचीला मर्यादा नक्की असावी, असे स्पष्ट करत अहिर यांनी तीन ते चार मजल्यांच्या झोपड्यांवरील कारवाईचे समर्थन केले.

आघाडी सरकारच्या काळात आपण गृहनिर्माण राज्यमंत्री असताना अवैध बांधकामास संबंधित विभागातील सहाय्यक आयुक्त व उपायुक्तांना जबाबदार धरून निलंबित करण्याचे विधेयक सरकारने मंजूर केले होते. अशा किती अधिकाऱ्यांवर पालिकेने कारवाई केली, असा सवाल अहिर यांनी केला. कारवाई झाली असती तर १४ फुटांवरील अवैध बांधकामे उभीच राहिली नसती, असा युक्तिवादही त्यांनी केला. चार-पाच वर्षांत उभ्या राहिलेल्या अशा बांधकामांना जबाबदार धरून अधिकाऱ्यांवर फौजदारी कारवाई करणार का, असा सवाल अहिर यांनी उपस्थित केला.