‘त्यांची’ परीक्षा होणार!

भवन्समधील विद्यार्थांना वायकर यांचा दिलासा

म. टा. प्र्रतिनिधी, मुंबई

गिरगाव चौपाटी येथील भवन्स कॉलेज प्रशासनाच्या दिरंगाईमुळे तीन विद्यार्थ्यांना हॉलतिकीटअभावी परीक्षेला मुकावे लागले होते. त्यामुळे त्यांचे वर्ष वाया जाण्याची भीती होती. परंतु उच्च व तंत्र शिक्षण राज्यमंत्री रवींद्र वायकर यांनी बुधवारी या विद्यार्थ्यांसाठी परीक्षा घेण्याची सूचना दिल्याने त्यांना दिलासा मिळाला आहे.

मुंबई विद्यापीठाच्या मादाम कामा रोड येथील मुलींचे वसतिगृह सुरू करण्यासाठी येणाऱ्या अडचणी दूर करण्यासाठी वायकर यांनी मंत्रालयीन दालनात बैठक बोलावली होती. यात परीक्षा घेण्यात येणार असल्याची माहिती देण्यात आली. हॉलतिकीट गोंधळात विद्यार्थ्यांची कोणतीही चूक नसल्याने विद्यार्थी तक्रार निवारण समितीत तक्रार दाखल करण्याची सूचनाही या विद्यार्थांना यावेळी देण्यात आली.

मुंबई विद्यापीठाचे कुलसचिव डॉ. एम. ए. खान, विनोद पाटील, बेस्टचे उदय वजनदार, अग्निशमनदलाचे अधिकारी, मुंबई महानगरपालिकेचे अधिकारी मोमीन महमदशाही, सिनेट सदस्य प्रदीप सावंत, महादेव जगताप, राजन कोळंबेकर आदी या बैठकील उपस्थित होते.

८ नोव्हेंबरला मॅरेथॉन बैठक

विद्यापीठात शिकणाऱ्या विद्यार्थ्यांना भेडसावणाऱ्या समस्या, तसेच विद्यापीठातील प्रलंबित प्रश्नांसाठी ८ नोव्हेंबरला कालिना येथे सकाळपासून दुपारपर्यंत बैठक घेण्यात येणार असल्याचे वायकर यांनी सांगितले. विद्यापीठाचे कुलगुरू, सगळ्या विभागांचे अधिकारी तसेच उच्च व तंत्रशिक्षण विभागाच्या सचिवांना या बैठकीला उपस्थित राहण्याच्या सूचना देण्यात यावी, असे त्यांनी कुलसचिव डॉ. एम. ए. खान यांना सांगितले.