म. टा. विशेष प्रतिनिधी, मुंबई
रेल्वे भरती बोर्डाकडून ग्रुप डी परीक्षांच्या तारखा जाहीर करण्यात आल्या असून, या परीक्षा १७ सप्टेंबर ते १६ ऑक्टोबरपर्यंत चालणार आहेत. मात्र, सोमवारपासून सुरू झालेल्या या परीक्षांसाठीचे हॉलतिकीटच विद्यार्थ्यांना अद्याप उपलब्ध झाले नसून, त्यामुळे परीक्षा द्यायची कशी आणि कुठे याबाबत विद्यार्थ्यांसमोर मोठे प्रश्नचिन्ह उभे राहिले आहे. हॉलतिकीटच उपलब्ध न झाल्याने अर्ज केलेल्या तरुणांना परीक्षेला मुकावे लागणार असल्याने त्यांच्यात प्रचंड रोष पसरला आहे.
रेल्वे भरती बोर्डाच्या माध्यमातून घेण्यात येणाऱ्या परीक्षांसाठी लाखो तरुणांनी अर्ज केले आहेत. ६३ हजार पदांसाठी ही भरती होणार असून, रेल्वेच्या या परीक्षा ऑनलाइन पद्धतीने होणार आहेत. मुंबईतून सेंट्रल रेल्वे झोनसाठी २३२१ जागांसाठी या परीक्षा असून, महाराष्ट्रातील नागपूर, नाशिक, पुणे, औरंगाबाद, जळगाव, अमरावती, मुंबईसह इतर परीक्षा केंद्रांवर त्या घेण्यात येणार आहेत. यासाठीचे हॉलतिकीट, क्रमांक, सेंटर कोड हे सर्व परीक्षेच्या चार दिवस आधी संकेतस्थळावर जाहीर करण्यात येणार होते. मात्र, हे संकेतस्थळच गेल्या चार दिवसांपासून सुरू होत नसल्याने विद्यार्थ्यांची पंचाईत झाली आहे.
तक्रार निवारणासाठी सुविधा नाही
विशेष म्हणजे एवढ्या मोठ्या प्रमाणावर भरती होत असूनही यासाठी विद्यार्थ्यांना कोणताही हेल्पलाइन क्रमांक उपलब्ध करून देण्यात आलेला नाही. त्यामुळे या संदर्भात नेमकी तक्रार कोणाकडे करायची किंवा मार्गदर्शन कोण करेल यासंबंधी विद्यार्थी अनभिज्ञ आहेत.
टप्प्याटप्प्याने होणाऱ्या परीक्षेनुसार हॉलतिकीट मिळणार असले तरी त्याविषयीचा संभ्रम बोर्डाने दूर करायलाच हवा. तशा सूचना विद्यार्थ्यांना द्यायला हव्यात. अन्यथा हॉलतिकीट मिळेपर्यंत विद्यार्थी तणावातच राहतील.
-सुधाकर तांबोळी, महाराष्ट्र विद्यार्थी नवनिर्माण सेना