- करचोरीची प्रकरणे अधिकाधिक उजेडात येणे शक्य
- दक्षता सप्ताहानिमित्त प्राप्तिकर विभागाची तयारी
म. टा. प्रतिनिधी, मुंबई
बेहिशेबी मालमत्तेसंबंधी एखाद्या करदात्याचा तपास सुरू केला की, तो करदाता अधिकाऱ्याला 'मॅनेज' करण्याची भीती याआधी होती. पण, आता हा तपास पडद्याआडून केला जातो. अखेरपर्यंत तपास अधिकारी कोण? हे करदात्याला कळतच नाही. यामुळेच करचोरीची प्रकरणे अधिकाधिक उजेडात येणे शक्य झाले आहे. सध्या सुरू असलेल्या दक्षता सप्ताहानिमित्त प्राप्तिकर विभागाने यावर काम सुरू केले आहे.
दक्षता सप्ताहानिमित्त गुरुवारी नेहरू विज्ञान केंद्रात विशेष परिसंवाद झाला. त्यामध्ये सरकारी कार्यालयांमधील दक्षतेसंबंधी प्राप्तिकर विभागाच्या अतिरिक्त आयुक्त (दक्षता) रिद्धी मिश्रा, एनटीपीसीचे प्रादेशिक कार्यकारी संचालक सी. व्ही. आनंद, 'फिक्की'च्या महिला विंगच्या सहसचिव सोनिया गोलानी व इंडियन इन्स्टिट्यूट ऑफ मटेरिअल मॅनेजमेंटच्या मुंबई विभागाचे माजी अध्यक्ष ए. पी. जयरामन यांनी सहभाग घेतला. कार्यक्रमानंतर रिद्धी मिश्रा यांच्याशी 'मटा'ने केलेल्या चर्चेदरम्यान त्यांनी नवीन प्रकारच्या तपासाची माहिती दिली.
'डिजिटायझेनमुळे प्राप्तिकर विभाग सर्वाधिक दक्ष झाला आहे. प्राप्तिकर परतावा सध्या ऑनलाइन असल्याने ठरलेल्या तारखेपूर्वी तो भरावाच लागतो. याआधी तारीख चुकली की पैसे देऊन मागील दिवसाचा शिक्का मारून तो भरणे शक्य होते. तसेच, प्राप्तिकराचा परतावा मिळविण्यासाठीही अनेकदा संबंधित अधिकाऱ्यांकडून दलालीचीही मागणी होत असे. पण, आता परतावा महिनाभराच्या आत थेट खात्यात जमा होतो. करदात्याची कुठल्याच प्रकारे नाहक छळवणूक होऊच शकत नाही. प्रत्येक करदाता आता विभागाच्या दृष्टीने एकाच पातळीवर आहे. ही एकप्रकारे दक्षताच आहे', असे रिद्धी मिश्रा म्हणाल्या.
'याआधी करचोरी झाली की करदात्याला कार्यालयात बोलवून त्याची तपासणी होत होती. आज करदात्याच्या करचोरीचा तपास ऑनलाइन होतो. संबंधित विभागाला व विभागाच्या कर्माचारी-अधिकाऱ्यांना करदात्याच्या करचोरीची माहिती तत्काळ ऑनलाइन पद्धतीने मिळू शकते. हा दक्षतेचाच एक भाग आहे', असेही रिद्धी मिश्रा यांनी सांगितले.
मालमत्ता खरेदी करताच 'फ्लॅश'
'बेनामी मालमत्तेबाबत वारंवार चर्चा होते. पण, मालमत्ता बेनामी असू शकत नाही. अशा प्रकारच्या सर्व मालमत्ता खरेदीवर प्राप्तिकर विभागाची करडी नजर आहे', असे मिश्रा यांनी आवर्जून सांगितले. 'देशात कुठेही मालमत्तेची खरेदी किंवा विक्री झाल्यास त्याचा 'फ्लॅश' तत्काळ प्राप्तिकर विभागाच्या पोर्टलवर येतो. अधिकारी व कर्मचारी त्यावर बारकाईने नजर ठेवून असतात', असे त्या म्हणाल्या.