​ ‘घ्यावे पुस्तक, द्यावे पुस्तक’

कुसुमाग्रज प्रतिष्ठानचा वाचनसंस्कृती जतनासाठी उपक्रम

घ्यावे पुस्तक, द्यावे पुस्तक

म. टा. खास प्रतिनिधी, मुंबई

सॉफ्टबुक्स, ई-बुक्सच्या काळात पुस्तकांच्या मूळ प्रती काळाच्या ओघात नष्ट होऊ नयेत, यासाठी कुसुमाग्रज प्रतिष्ठानच्या माध्यमातून ‘ग्रंथ तुमच्या दारी’अंतर्गत एक नवा उपक्रम हाती घेण्यात आला आहे. ‘घ्यावे पुस्तक, द्यावे पुस्तक’ या उपक्रमाअंतर्गत आपल्याजवळचे एकदा वाचल्यानंतर पुन्हा हाती न घेतलेले, वर्षानुवर्षे कपाटात असलेले पुस्तक देऊन, त्या बदल्यात न वाचलेले पुस्तक घेता येईल. या आधी हा उपक्रम नाशिक आणि ठाण्यामध्ये राबवण्यात आला असून येत्या २७ आणि २८ मे रोजी ही पुस्तके मुलुंडमध्ये पोहोचणार आहेत.

‘घ्यावे पुस्तक, द्यावे पुस्तक’ या उपक्रमासंदर्भात बोलताना ‘ग्रंथ तुमच्या दारी’ या संकल्पनेचे जनक विनायक रानडे यांनी सांगितले की ‘ग्रंथ तुमच्या दारी’च्या माध्यमातून कुसुमाग्रज प्रतिष्ठानने वाचकांपर्यंत पुस्तके पोहोचवली. सर्वसाधारणपणे मराठी वाचकांकडे स्वतःची पुस्तके असतातच. पुढच्या पिढ्या प्रत्यक्ष पुस्तकापेक्षा ई-बुकवर भर देत असल्याने ही पुस्तके विस्मरणात जाण्याची भीती आहे. त्यामुळे वाचनाचा आनंद वाटून घेण्यासाठी हा उपक्रम सुरू केल्याची माहिती रानडे यांनी दिली. या आदानप्रदान उपक्रमामुळे पुस्तके अधिकाधिक लोकांपर्यंत पोहोचतील. एखादे पुस्तक वाचून झाले की ते देऊन दुसरे घ्यायचे, यामध्ये वाचक आपल्याकडील पुस्तक देणार असल्याने कोणतेही शुल्क त्यासाठी लागू होणार नाही.

मुलुंड येथे पाचशेहून अधिक पुस्तके आदानप्रदान उपक्रमासाठी मांडली जाणार आहेत. यात कथा, कादंबरी इथपासून बालसाहित्याचाही समावेश असेल. इंग्रजीही पुस्तकेही उपलब्ध करून दिली जातील. मराठी पुस्तके देऊन इंग्रजी पुस्तकेही वाचकांना घेता येतील. यामध्ये नवीकोरी पुस्तकेही असतील.

‘ग्रंथ तुमच्या दारी’ उपक्रमाला २००९ पासून सुरुवात झाली असून आतापर्यंत भारतात आणि भारताबाहेर नेदरलँड, टोकियो, अटलांटा, स्वित्झर्लंड, ऑस्ट्रेलिया येथे तब्बल पावणे दोन कोटींची पुस्तके फिरत आहेत.

ठाणे, नाशिकमध्ये यशस्वी आदानप्रदान

गेल्या महिन्यात ठाण्याला हा उपक्रम दोन दिवस राबवण्यात आला होता. त्यावेळी सुमारे दोन हजार पुस्तकांचे आदानप्रदान झाले. नाशिकमध्ये या उपक्रमाला सुरुवात झाली असून नाशिकमध्ये एकूण तीन हजार पुस्तकांचे आदानप्रदान झाले. मुलुंडनंतर कल्याण आणि पुणे येथेही हा उपक्रम राबवण्यात येणार आहे.

कार्यक्रम कुठे?

येत्या शनिवारी आणि रविवारी मुलुंडमध्ये विजयवाडी सोसायटी, लोकमान्य टिळक रोड, हनुमान चौक, मुलुंड पूर्व येथे हा उपक्रम होईल. शनिवारी सायं. ५ ते ८ आणि रविवारी सकाळी ८ ते रात्री ८ या काळात वाचक या उपक्रमात सहभागी होऊ शकतात. रविवारी सकाळी १० वाजता सुप्रसिद्ध लेखिका वीणा गवाणकर यांच्याशी गप्पा मारता येणार आहेत.