गोरे उड्डाणपुलाचा विस्तार

म. टा. प्रतिनिधी, मुंबई

पश्चिम उपनगरातील एस. व्ही. रोड जंक्शनवर होणारी वाहतूक कोंडी टाळण्यासाठी मृणालताई गोरे उड्डाणपुलाचा राम मंदिर ते रिलीफ रोडपर्यंत विस्तार करण्याचा निर्णय महापालिकेने घेतला आहे. या विस्तारात पश्चिम द्रुतगती मार्ग, गोरेगाव पश्चिम व लिंक रोड हे विशिष्ट भाग कमी अंतराने जोडण्यात येतील व एस. व्ही. रोडवरील वाहतूक कोंडी कमी होण्यास मदत होणार आहे. या कामासाठी २०९ कोटी ६४ लाख रु. खर्च येणार आहे.

विस्तारीकरणाचा प्रस्ताव स्थायी समितीच्या बैठकीत मंजुरीसाठी मांडण्यात आला आहे. प्रस्तावास मंजुरी मिळाल्यानंतर कंत्राटदाराला पालिकेकडून कार्यादेश प्राप्त होणार असून, त्याने आगामी दोन वर्षांत पुलाच्या विस्तारीकरणाचे काम पूर्ण करायचे आहे. विस्तारित पुलाची लांबी ८४० मीटर, रुंदी १५.५० मीटर असणार आहे.