वर्सोवा, अंधेरी पूर्वेला अपक्षामुळे चुरस
म. टा. विशेष प्रतिनिधी, मुंबई
वायव्य मुंबईचे प्रस्थापित उमेदवार २०१९च्या विधानसभा निवडणुकीतही विजयी झाले. मात्र यामध्ये अपक्षांनी वर्सोवा आणि अंधेरी पूर्वेला चुरस आणली. गेल्या वेळी शिवसेना, भाजप, काँग्रेस, राष्ट्रवादी हे चारही पक्ष स्वतंत्रपणे रिंगणात असल्याने विजयाचे पारडे वर-खाली झाले होते. यंदाची वायव्य मुंबईतील लक्षवेधी बाब म्हणजे जोगेश्वरी मतदारसंघात १२ हजार मतदारांनी नोटाचा वापर केला. हा मुंबईतील सर्वाधिक नोटा वापरणारा मतदारसंघ ठरला आहे.
दिंडोशीमध्ये सन २०१४ च्या विधानसभा निवडणुकीमध्ये शिवसेनेचे सुनील प्रभू १९ हजार ८२८ मतांनी विजयी झाले होते. तर यंदाचा विजय ४४ हजार ५११ मतांनी झाला आहे. त्यांनी राष्ट्रवादीच्या विद्या चव्हाणांचा पराभव केला. यात मनसेनेही २५ हजार ८५४ मते घेऊन लढत दिली. गोरेगावात भाजपच्या विद्या ठाकूर विजयी झाल्या आहेत. या मतदारसंघात गेल्या वेळी सुभाष देसाई रिंगणात होते. त्यामुळे विजयाची घोडदौड केवळ ४ हजार ७५६ मतांनी झाली होती. सन २०१९च्या विधानसभा निवडणुकीत मात्र ४८ हजार ९०७ मतांनी त्यांचा विजय झाला आहे. काँग्रेसकडून पत्रकार युवराज मोहिते रिंगणात होते. मनसेच्या वीरेंद्र जाधव यांनी २६ हजार ६८९ मते मिळवली.
जोगेश्वरी पूर्व येथे शिवसेनेच्या रवींद्र वायकरांनी आपली जागा कायम राखली. गेल्या वेळी २८ हजार ९६२ मतांनी वायकरांनी विजय मिळवला तर यंदा हा फरक ५८ हजार ५७९ मतांचा आहे. काँग्रेसच्या सुनील कुमरे यांचा वायकरांनी पराभव केला.
वर्सोवा येथील लढत बंडखोर शिवसेना नेत्या राजूल पटेल यांच्यामुळे लक्षवेधी ठरली. डॉ. भारती लव्हेकर या गेल्या वेळी २६ हजार ३९८ मतांनी विजयी झाल्या होत्या. तर यंदा मात्र हा फरक ५ हजार १८६ मतांवर आला. मतदारसंघात बलदेव खोसा हे दुसऱ्या क्रमांकाचे उमेदवार ठरले. अंधेरी पूर्वेला शिवसेनेचे रमेश लटके विजयी झाले. त्यांनी अपक्ष मुरजी पटेल यांचा पराभव केला. अंधेरी पश्चिमेला भाजपचे अमित साटम यांनी काँग्रेसच्या अशोक जाधव यांचा पराभव केला.
विधानसभा- गोरेगाव- विद्या ठाकूर- भाजप- ८१ हजार २३३
विधानसभा- दिंडोशी- सुनील प्रभू- शिवसेना- ८२ हजार २०३
मतदारसंघ- जोगेश्वरी पूर्व- रवींद्र वायकर- शिवसेना- ९० हजार ४०१
मतदार संघ वर्सोवा- भाजप- डॉ. भारती लव्हेकर ४१ हजार ०५७
मतदारसंघ- अंधेरी पूर्व- रमेश लटके- शिवसेना- ६२ हजार ७७३
मतदारसंघ- अंधेरी पश्चिम- अमित साटम- ६५ हजार ६१५