म. टा. प्रतिनिधी, मुंबई
टाळ्यांचा कडकडाट, शिट्या, कलाकारांच्या अभिनयाला प्रेक्षागृहातून उत्स्फूर्तपणे मिळणारा प्रतिसाद आणि जाणकार नाटककारांकडून मिळालेली शाब्बासकीची थाप. अशा दिमाखदार वातावरणात अवघे शिवाजी नाट्यमंदिर शनिवारी दुमदुमून केले होते. निमित्त होते ते मुंबईतील पहिल्यावहिल्या प्रायोगिक नाट्यमहोत्सवाचे. विशेष म्हणजे हा प्रायोगिक नाट्यमहोत्सव एका व्हॉट्सअॅप ग्रुपच्या संकल्पनेतून आयोजित करण्यात आला होता. मराठी नाट्यविश्वातील रंगकर्मींच्या 'मराठी नाटक समूह' व्हॉट्सअॅप ग्रुप आयोजित आणि 'श्री छत्रपती शिवाजी मंदिर स्मारक ट्रस्ट' व 'प्रशांत दामले फॅन फाऊंडेशन' यांच्या संयुक्त विद्यमाने हा विशेष प्रायोगिक नाट्यमहोत्सव शनिवारी दादर येथील शिवाजी नाट्यमंदिरमध्ये पार पडला. 'महाराष्ट्र टाइम्स' या महोत्सवाचा मीडिया पार्टनर होता.
प्रायोगिक रंगभूमीला नवी चेतना देण्यासाठी आयोजित करण्यात आलेल्या या नाट्यमहोत्वात 'ड्रीम थिएटर, मुंबई'ची 'शिकस्त-ए-इश्क', 'महाराष्ट्र कल्चर सेंटर, पुणे'ची 'वाय' आणि 'मेराकी थिएटर, नागपूर'ची '...आणि शेवटी पार्थना' या नाटकांचे हाऊसफुल्ल प्रयोग रंगले होते. प्रायोगिक नाटकांची गोडी मराठी जनमानसात रुजवण्यासाठीचे हे पहिले पाऊल असून येत्या काळात हा प्रायोगिक नाट्यमहोत्सव अजून दिमाखदार करत आठवडाभर आयोजित करण्याचा मानस असल्याचे ज्येष्ठ दिग्दर्शक पुरुषोत्तम बेर्डे यांनी सांगितले.
काकडे, भुथाडिया यांचा सन्मान
ज्येष्ठ रंगकर्मी अरुण काकडे यांनी प्रायोगिक रंगभूमीला दिलेल्या अमूल्य योगदानासाठी त्यांना या महोत्सवात सन्मानित करण्यात आले. तसेच प्रायोगिक रंगभूमीवर आपल्या कामाचा ठसा उमटवणारे रवी लाखे आणि डॉ. शरद भुथाडिया यांचा देखील यावेळी सन्मान करण्यात आला. अंध कलावंतांना घेऊन विशेष नाट्यप्रयोग करणारे स्वागत थोरात, बॉक्स थिएटर ही संकल्पना प्रत्यक्षात आणणारे गोव्याचे विजयकुमार नाईक आणि काश्मीर, हेमलकसा, भंडारा यासारख्या ठिकाणी सातत्याने नाट्य कार्यशाळा घेऊन बालरंगभूमीवर विशेष योगदान देणारे संजय हळदीकर यांच्याही कार्याचा यावेळी गौरव करण्यात आला. अभिनेता संदीप कुलकर्णी, अभिराम भडकमकर, विजय कदम, दिलीप जाधव, राजीव जोशी, अनिल गवस आदी अनेक रंगकर्मींनी नाट्यमहोत्सवाला हजेरी लावली होती.