लाखोंचा पोशिंदा भीक मागतोय...

म. टा. विशेष प्रतिनिधी, मुंबई

वरूणराजाने अवकृपा केली...टँकरचे दर परवडेनासे झाले...पाटाचे पाणी कोरडे झाले...परिणामी डाळिंबाची बाग जळून खाक झाली. जे काही पीक आले, त्यालाही व्यापाऱ्याने भाव दिला नाही. बँकेचे कर्जाचे पैसे न भरल्यामुळे सातबाऱ्यावर बँकेचे नाव चढले. यामुळे कर्जाचा डोंगर कसा दूर करायचा, दैनंदिन खर्च कसा भागवायचा याचे आव्हान उभे ठाकलेल्या सांगली जिल्ह्यातील कवठेमहांकाळजवळील मोरगाव येथील नारायण पोवार या शेतकऱ्याला मुंबईत चक्क भीक मागावी लागत आहे. कर्जाची परतफेड करण्यासाठी पै अन् पै जोडण्यासाठी पोवार सध्या मुंबईतील लोकलमध्ये धक्के खात भीक मागत आहेत.

लाखोंचा पोशिंदा असलेल्या शेतकऱ्यावर कोणते अस्मानी संकट कोसळले आहे, याचे पोवर हे एक उदाहरण आहे. मोरगावात पोवर यांचे तीन एकरांचे शेत आहेत. तेथे त्यांनी चार वर्षांपूर्वी डाळिंबाची बाग पिकवण्यास सुरुवात केली. विविध बँकांचे कर्ज घेतले. पहिली दोन वर्षे फळ येत नसल्याने उत्पन्न मिळाले नाही. मात्र शेळीपालन व इतर व्यवसायांतून बँकेचे हप्ते चुकवण्यास सुरुवात केली. मात्र गेल्या वर्षी पावसाच्या अवकृपेमुळे पाटाचे पाणीही आटले. टँकरचा आठवड्याचा सुमारे १५ हजार रुपयांचा खर्च न परवडणारा. त्यामुळे बाग जळून गेली. त्यातच व्यापाऱ्याकडून शेळीविक्रीतही फसवणूक झाली. यामुळे पोवार यांची अवस्था अधिकच बिकट झाली. हाती कोणतेही साधन नसल्याने त्यांना भीक मागण्याचा पर्याय स्वीकारावा लागला...आणि सरकार व एकंदर समाजाच्याच इभ्रतीवर डाग लागला.

दिवाळीपर्यंतच मुदत

पोवार यांना सरकारच्या कर्जमाफी योजनेचा लाभ मिळाला नाही. यामुळे हतबल होऊन त्यांनी मुंबई गाठली व लोकलमध्ये भीक मागून पैसे जमा करण्याचा पर्याय स्वीकारला. दिवाळीपर्यंत भीक मागून जेवढे पैसे जमतील, तेवढे जमवून बँकेत भरण्याचा त्यांचा विचार आहे. किमान जमीन बँकेच्या ताब्यात जाण्यापासून काही काळासाठी दिलासा मिळवण्याचा त्यांचा प्रयत्न आहे.