शेतकऱ्यांच्या कर्जमुक्तीवर शिवसेना ठाम

मटा ऑनलाइन वृत्त । मुंबई

कर्जमुक्तीच्या मागणीवर शिवसेना ठाम असून बळीराजाला कर्जमुक्ती मिळावी म्हणून शिवसेना पक्षप्रमुख उद्धव ठाकरे हे स्वत: मुख्यमंत्री देवेंद्र फडणवीस यांच्यासोबत चर्चा करणार आहेत, असे 'मातोश्री' निवासस्थानी झालेल्या शिवसेना मंत्र्यांच्या बैठकीनंतर स्पष्ट करण्यात आले.

उद्धव ठाकरे यांनी आपल्या निवासस्थानी शिवसेनेच्या मंत्र्यांची महत्त्वाची बैठक बोलावली होती. या बैठकीला सेनेचे सर्व मंत्री हजर होते. मध्यावधी निवडणुकांची चर्चा, शेतकऱ्यांच्या कर्जमुक्तीचा मुद्दा, भाजपकडून मिळणारी वागणूक, आमदारांच्या तक्रारी असे अनेक मुद्दे या बैठकीच्या अजेंड्यावर असल्याने या बैठकीकडे सर्वांचे लक्ष लागले होते. दरम्यान, बैठकीनंतर एकनाथ शिंदे, रामदास कदम आणि विजय शिवतारे यांनी माध्यमांना बैठकीबाबत माहिती दिली.

ग्रामीण भागात नव्याने पक्ष बांधणी, केंद्रातली भूमिका, आमदारांच्या मतदारसंघातील कामं आणि पुढच्या निवडणुकीसाठी मोर्चेबांधणी याबाबत आजच्या बैठकीत चर्चा झाल्याचे रामदास कदम यांनी नमूद केले. शेतकऱ्यांच्या कर्जमुक्तीवर शिवसेनेची भूमिका ठाम असून कर्जमुक्तीची मागणी व आमदारांच्या मतदारसंघातील कामं याबाबत उद्धव ठाकरे मुख्यमंत्र्यांशी चर्चा करणार आहेत, असे कदम यांनी स्पष्ट केले. भाजपकडून डावललं जातंय ही गोष्ट खरी असून याबाबतही मुख्यमंत्र्यांशी चर्चा केली जाणार असल्याचे कदम पुढे म्हणाले. तर आजच्या बैठकीत संघटनात्मक बाबी, शेतकरी कर्जमुक्ती आणि आमदारांच्या मतदारसंघातील विकासकामांचा आढावा घेण्यात आला, असे एकनाथ शिंदे यांनी सांगितले.

शिवसेनेचं शिष्टमंडळ उद्या मुख्यमंत्र्यांना भेटणार

भाजपच्या लोकप्रतिनिधींना शिवसेना सदस्यांच्या तुलनेत जास्त निधी मिळतो याबाबत नाराजी असून मुख्यमंत्र्यांनी यापूर्वीच्या बैठकीत आमदारांच्या कामांची यादी मागितली होती. याबाबत उद्या सकाळी १० वाजता शिवसेनेचे सर्व मंत्री मुख्यमंत्र्यांची वर्षा निवासस्थानी भेट घेणार आहेत, असे विजय शिवतारे यांनी सांगितले.