बेस्टचा स्वस्त प्रवासाचा मार्ग खुला
बेस्ट उपक्रमाचा कायापालट घडविण्याऱ्या बेस्ट भाडेकपातीच्या प्रस्तावाला बुधवारी राज्य परिवहन प्राधिकरणाच्या (आरटीए) बैठकीत अखेर मंजुरी लाभली. बेस्ट समिती, पालिका सभागृहानंतर आरटीएच्या बैठकीत दरकपातीचा प्रस्ताव मंजूर होणे आवश्यक होते. त्यास संमती मिळाल्याने प्रत्यक्ष दरकपात आणि बेस्ट भाडे सुसूत्रीकरणाचा मार्ग मोकळा झाला आहे. त्यामुळे बेस्टच्या साध्या बसचे किमान तिकीट पाच रुपये आणि एसी बसचे किमान तिकीट सहा रुपये होणार आहे.
..
बौद्ध अभ्यास प्रमाणपत्र अभ्यासक्रम
बौद्ध चित्रकला- लेणीशास्त्र, बौद्ध अर्थशास्त्र, बौद्ध ज्ञानशास्त्र आणि बौद्ध मुत्सद्देगिरी यांचा एकत्रित समावेश असलेला नवा कोरा बौद्ध अभ्यास हा तीन महिन्यांचा प्रमाणपत्र अभ्यासक्रम अंधेरी पश्चिमेस असलेल्या कर्मवीर दादासाहेब गायकवाड सांस्कृतिक केंद्राच्या वतीने आयोजिण्यात आला आहे. येत्या शनिवार, १३ जुलैपासून दर शनिवारी सायंकाळी ४ वाजता हे वर्ग होणार आहेत. या अभ्यासक्रमात प्रवेशासाठी शैक्षणिक अर्हतेची अट नाही. विषयाचा अभ्यास करण्याची आवड हा एकमेव पात्रता निकष आहे. संपर्क- ९३२४०२२९९८, ९६६५७९५९०० किंवा ०२२२६३३६६७१. पत्ता- कर्मवीर दादासाहेब गायकवाड सांस्कृतिक केंद्र, ज्ञान केंद्र शाळेसमोर, चार बंगला, अंधेरी(पश्चिम). वर्सोवा मेट्रो स्टेशनपासून पाच मिनिटांच्या अंतरावर.
..
सेवाभावी डॉक्टरांचा सन्मान
नाना पालकर स्मृती समितीतर्फे रविवार, ७ जुलै रोजी सेवाभावी वृत्तीने कार्य करणाऱ्या काही मान्यवर डॉक्टरांचा सत्कार करण्यात येणार आहे. १ जुलै रोजी झालेल्या 'राष्ट्रीय डॉक्टर दिना'निमित्त या कार्यक्रमाचे आयोजन करण्यात आले आहे. या कार्यक्रमात अॅक्ट्रेक टाटा मेमोरियल सेंटर, खारघर येथील डॉ. सुदीप गुप्ता, ठाणे येथील डॉ. सुपर्णा निरगुडकर आणि पुणे येथील सोहम ट्रस्टचे अध्यक्ष डॉ. अभिजित सोनावणे यांचा सत्कार करण्यात येणार आहे. या कार्यक्रमाचे अध्यक्षस्थान राष्ट्रीय स्वयंसेवक संघाचे अखिल भारतीय संपर्क प्रमुख अनिरुद्ध देशपांडे भूषविणार असून त्यांच्या हस्ते या मान्यवर डॉक्टरांचा सत्कार करण्यात येणार आहे. वसंत स्मृती, दादासाहेब फाळके रोड, दादर पूर्व येथे संध्याकाळी ५.३० वाजता कार्यक्रम पार पडणार आहे.