'माओ'वादावर व्याख्यान
स्वातंत्र्यवीर सावरकर राष्ट्रीय स्मारक व नंदादीप समिती यांच्या वतीने वीरपत्नी येसूवहिनी सावरकर, माई तथा यमुनाबाई सावरकर आणि शांताबाई सावरकर यांचा एकत्रित स्मृतीदिन ८ नोव्हेंबरला सायंकाळी ७ वाजता मादाम कामा सभागृह, स्वातंत्र्यवीर सावरकर राष्ट्रीय स्मारक, शिवाजी पार्क येथे आयोजित करण्यात आला आहे. याप्रसंगी कॅप्टन स्मिता गायकवाड यांचे 'माओवाद्यांचे प्रचारतंत्र' विषयावर व्याख्यान होणार आहे. हा कार्यक्रम सर्वांसाठी खुला आहे.
डॉ. जोशी यांना पुरस्कार
मुंबई साहित्य संघाचा प्रा. रा. भि. जोशी वैचारिक साहित्य पुरस्कार (निलिमा भावेपुरस्कृत) डॉ. प्रकाश जोशी यांच्या 'श्रद्धा आणि बाजार', (शर्वा प्रकाशन) या पुस्तकाला मिळाला आहे. रोख १० हजार, सन्मान चिन्ह असे पुरस्काराचे स्वरूप आहे. पुरस्कार समितीचे काम प्रा. उषा तांबे व साहित्यिक अशोक बेंडखळे यांनी पाहिले. पुरस्कारवितरण सोहळा ९ नोव्हेंबरला सायं. ४ वा. संघ मंदिर, केळेवाडी, गिरगाव येथे होणार असल्याचे साहित्य संघातर्फे कळवण्यात आले आहे.
संगीत कार्यक्रम
दादर-माटुंगा सांस्कृतिक केंद्राच्या ६७व्या वर्धापनदिनानिमित्त १५ ते १७ नोव्हेंबर या कालावधीत दररोज सायंकाळी ५ वाजता संस्थेच्या सभागृहात संगीत कार्यक्रम होणार आहेत. १५ नोव्हेंबरला जयपूर अत्रौली घराण्याचे सुप्रसिद्ध गायक पं. रघुनंदन पणशीकर यांचे शास्त्रीय गायन, १६ रोजी विख्यात सरोदवादक पं. पार्थो सारथी यांचे सरोदवादन होईल. महोत्सवाची सांगता १७ नोव्हेंबरला होत असून त्यानिमित्ताने ज्येष्ठ गायक पं. उल्हास कशाळकर यांचे शास्त्रीय गायन होईल. हे कार्यक्रम सर्वांसाठी खुले असून, निःशुल्क प्रवेशासाठी प्रवेशिका घेणे बंधनकारक आहे. प्रवेशिकाधारकांनाच प्रवेश दिला जाईल. ८ नोव्हेंबरपासून त्या संस्थेच्या कार्यालयात उपलब्ध आहेत.