प्रथमेश राणे, कॉलेज क्लब रिपोर्टर
प्रामुख्यानं मराठी माणसांचा भरणा, मध्यम वर्गाचं प्रतिनिधित्व करणारी चाळ संस्कृती, 'प्रति कोकण' अशी ओळख आणि खरीखुरी वाटतील अशी लाईव्ह लोकेशन्स अशा अनेक कारणांमुळे मराठी मनोरंजनसृष्टी भांडुपच्या प्रेमात पडली आहे. मध्य रेल्वेवरील महत्त्वाचं स्थानक असलेल्या भांडुपमधील अनेक चाळींमध्ये सध्या 'लाईट्स, कॅमेरा...अॅक्शन'चा खडा आवाज घुमायला लागलाय. कलाकृतीला वास्तववादी टच देण्यासाठी भांडुपला पसंती मिळत असल्याचं काही दिग्दर्शकांचं म्हणणं आहे.
सुबोध भावेची प्रमुख भूमिका असलेल्या 'तुला पाहते रे' या मालिकेचं चित्रीकरण सध्या भांडुपच्या कोकण नगर, खडीमशीन भागात सुरू असून, याआधी 'पुष्पक विमान' या सिनेमाचं चित्रीकरण तिथे झालं होतं. या निमित्तानं मोहन जोशी, सुबोध भावे यांनी गणेश नगर, भांडुप पाइपलाईन विभागात हजेरी लावली होती. अलीकडेच गिरीजा ओक देखील तिच्या 'स्पर्श वात्सल्याचा' मालिकेच्या चित्रीकरणाच्या निमित्तानं भांडुपमध्ये येऊन गेली. याआधी देखील विविध मालिका, सिनेमांचं चित्रिकरण भांडुपमध्ये झालं होतं. नसिरुद्दीन शहा, शर्मन जोशी आणि विक्रम गोखले यांच्या भूमिका असलेल्या 'अल्ला के बंदे'चं शूटही खडीमशीन विभागात करण्यात आलं होतं.
मी स्वतः मुलुंडला राहत असल्यामुळे भांडुप मी फार जवळून पाहत आलोय. त्यामुळे या सर्व जागांची रेकी करून आम्ही ही जागा ठरवली आणि चित्रीकरण सुरू केलं. खरंतर, ज्या भागात आम्ही मालिका चित्रित करतोय त्या विभागातले लोक खूप समजदार असून, जमेल तशी आम्हाला मदत करत असतात. इतर वेळी जसा अतिउत्साही प्रेक्षकांचा त्रास आम्हाला जाणवतो. तसा कुठलाही त्रास आम्हाला भांडुपमध्ये जाणवला नाही.
- गिरीश मोहीते, दिग्दर्शक (मालिका - तुला पाहते रे)
फार वर्षापूर्वी माझं भांडुपमध्ये येणं-जाणं होतं. त्यामुळे भांडुप आणि इथली चाळसंस्कृती माझ्या खूप चांगल्या प्रकारे परिचयाची होती. 'पुष्पक विमान' चित्रित करताना कथेनुसार माझ्या डोळ्यासमोर 'भांडुप' हीच जागा पहिल्यांदा समोर आली. भांडुपच्या लोकांचा आमच्या टीमला खूप छान पाठिंबा मिळाला होता.
- वैभव चिंचाळकर, दिग्दर्शक (सिनेमा - पुष्पक विमान)
भांडुपमध्ये शूटिंग झालेल्या कलाकृती
तुला पाहते रे - मालिका
पुष्पक विमान - चित्रपट
स्पर्श वात्सल्याचा - मालिका
नवाबजादे - हिंदी चित्रपट