रुइयात केमिस्ट्रीवर आधारित ‘केम फेस्ट रिअॅक्ट’

नेहा कदम, रुइया कॉलेज

नवनव्या थीम्स आणि इव्हेंट्सच्या माध्यमातून कॉलेजचे विद्यार्थी संध्या फेस्टचा आनंद लुटत आहेत. असाच एक भन्नाय फेस्ट रुइया कॉलेजमध्ये रंगणार आहे. कॉलेजच्या केमिस्ट्री विभागाच्या वतीने आयोजित ‘केम फेस्ट रिअॅक्ट’ या आंतरमहाविद्यालयीन फेस्टमध्ये मजामस्तीबरोबरच खूप काही शिकायलासुद्धा मिळणार आहे. ‘महाराष्ट्र टाइम्स’ या फेस्टचा मीडिया पार्टनर आहे.

‘केम फेस्ट रिअॅक्ट’ हा फेस्टिव्हल २२ आणि २३ डिसेंबर रोजी होणार आहे. केमिस्ट्रीचे विविध गंमतीदार जादूचे प्रयोग हे या फेस्टचे वैशिष्ट्य. केम क्विझ, केम रिले, सिच्युएशन रिझोल्यूशन, केमहंट ही केमिस्ट्रीवर आधारित ट्रेझर हंट, या विषयातील हटके युक्त्या सांगणारे मॅड सायन्स, मर्डर मिस्ट्रीचे कोडे सोडवणारे अंडरसीक, वर्ड वॉर्स, केम -ओ -फन आदी स्पर्धा, सत्रे रंगणार आहेत.

यासोबत या फेस्टिव्हलचे यंदाचे आकर्षण म्हणजे रुइयाच्या कॅम्पसमध्ये एक भलीमोठी सापशिडी

दिसणार आहे. यामध्ये केमिस्ट्रीसंबंधी अनेक खेळ खेळले जाणार आहेत. त्याशिवाय ‘नायट्रो टपरी’मध्ये द्रव्य नायट्रोजनपासून बनवलेल्या अनेक पदार्थांची चव चाखायला मिळणार आहे. केम-ओ-फेअरमध्ये फनफेअरसोबत खेळ खेळण्याची संधी मिळेल. केमिस्ट्रीसारख्या विषयाबाबत थोडं क्रिएटिव्ह होण्याची संधीही या फेस्टमध्ये मिळणार आहे. बॉडी आर्ट, नेल डेकोर, फेस पेंटिंग आणि टॅटू आदी कलांची क्रिएटिव्ह सफरही फेस्टमध्ये घडणार आहे. केमिस्ट्री विभागाचा फेस्टिव्हल असला, तरी कमाल इव्हेंट्सची मांदियाळी फेस्टिव्हलमध्ये दिसणार

आहेत.