मध्य रेल्वेच्या प्रवाशांसाठी महत्वाची बातमी! मेगाब्लॉकमुळे गाड्यांचा खोळंबा, वेळापत्रकातही बदल

म. टा. प्रतिनिधी, मुंबई : कोपर, दिवा आणि टिटवाळा या स्थानकांत रेल्वे उड्डाणपुलाचे गर्डर उभारणे आणि खडवली-आसनगावदरम्यान इलेक्ट्रॉनिक इंटरलॉकिंग यंत्रणा उभारण्यासाठी आज, शनिवारी मध्यरात्री ते रविवार पहाटेपर्यंत गर्डर उभारण्याचे काम मध्य रेल्वेकडून हाती घेण्यात आले आहे. यामुळे मुंबईकडे येणाऱ्या आणि मुंबईहून सुटणाऱ्या १५ मेल-एक्स्प्रेसचा खोळंबा होणार आहे. या एक्स्प्रेस १५ मिनिटे ते अडीच तास यादरम्यान विलंबाने धावणार आहेत.

शनिवारी मध्यरात्रीपासून रविवारी पहाटेपर्यंत ब्लॉक

छत्रपती शिवाजी महाराज टर्मिनस ते कसारा-कर्जत मार्गावर शनिवारी मध्यरात्री एक वाजल्यानंतर रविवारी पहाटे पाच वाजेपर्यंत ब्लॉक घेण्यात येणार आहे. यामुळे ११०२० भुवनेश्वर-सीएसएमटी, १८५१९ विशाखापट्टनम-सीएसएमटी, १२७०२ हैद्रराबाद-सीएसएमटी, १११४० गदग-सीएसएमटी, २२१५८ चेन्नई-सीएसएमटी, ११०२२ तिरुनेलवेली-दादर या गाड्या कर्जत-पनवेल-दिवामार्गे धावणार आहेत. २२१७७ सीएसएमटी-वाराणसी महानगरी आणि २२५३८ एलटीटी-गोरखपूर गाड्या ठाणे ते कल्याण धीम्या मार्गावर धावणार आहेत. १२२९० नागपूर-सीएसएमटी दुरांतो एक्स्प्रेस, १८०३० शालिमार-लोकमान्य टिळक टर्मिनस, १२८१० हावडा-सीएसएमटी, २०१०४ गोरखपूर-एलटीटी, ११४०२ आदिलाबाद-सीएसएमटी, १२११२ अमरावती-सीएसएमटी, १७०५८ सिकंदराबाद-सीएसएमटी, १२२९० दुरांतो या गाड्या १५ मिनिटे ते अडीच तास विलंबाने धावणार आहेत, असे रेल्वे अधिकाऱ्यांनी स्पष्ट केले.

चाकरमान्यांसाठी महत्त्वाची सूचना; सीएसएमटीहून उद्या सुटणाऱ्या शेवटच्या लोकलच्या वेळेत बदल
११.५१ वाजता सीएसएमटीवरून शेवटची लोकल

आज शनिवारी रात्री ११.५१ वाजता सीएसएमटीवरून कर्जत दिशेला धावणारी शेवटची लोकल असणार आहे. रात्री १०.५१ वाजता सुटणारी सीएसएमटी-कसारा ही कसारा दिशेची शेवटची लोकल असेल. यामुळे रात्री उशिरा प्रवास करणाऱ्या प्रवाशांना सीएसएमटी स्थानकात लवकर पोहोचावे लागणार आहे.