म. टा. प्रतिनिधी, मुंबई
ओबीसी, विशेष मागास प्रवर्ग आणि भटक्या विमुक्त जाती जमाती विभागाचे मंत्री विजय वडेट्टीवार यांच्याकडे आपत्ती व्यवस्थापन आणि मदत व पुनर्वसन ही जादा खाती सोपविण्यात आली आहेत, अशी माहिती राज्य सरकारतर्फे शनिवारी देण्यात आली.
यापूर्वी आपत्ती व्यवस्थापन, मदत व पुनर्वसन ही खाती वन मंत्री संजय राठोड यांच्याकडे होती.
संजय राठोड यांच्याकडे आता विजय वडेट्टीवार यांच्याकडील भूकंप पुनर्वसन खाते सोपविण्यात आले आहे. मुख्यमंत्री उद्धव ठाकरे यांच्या शिफारशीनंतर राज्यपाल भगतसिंग कोश्यारी यांनी या खातेबदलास शुक्रवारी मान्यता दिली असल्याची माहिती सरकारतर्फे देण्यात आली. यामुळे आता विजय वडेट्टीवार यांच्याकडे ओबीसी, सामाजिक व शैक्षणिक मागास प्रवर्ग, विमुक्त जाती, भटक्या जमाती आणि विशेष मागास प्रवर्ग कल्याण, खार जमिनी विकास, आपत्ती व्यवस्थापन, मदत व पुनर्वसन ही खाती, तर संजय राठोड यांच्याकडे वने, भूकंप पुनर्वसन ही खाती राहतील.