मुंबई: ससून डॉकजवळ भंगार गोदामाला आग

मुंबई: दक्षिण मुंबईतील ससून डॉकजवळील भंगार गोदामाला भीषण आग लागल्याची घटना मध्यरात्री घडली. या आगीत कोणतीही जीवितहानी झाली नाही. अग्निशमन दलाच्या कर्मचाऱ्यांनी तब्बल सव्वा दोन तासांच्या शर्थीच्या प्रयत्नांनंतर आगीवर नियंत्रण मिळवले.

ससून डॉकजवळ हे दोन मजली भंगार गोदाम आहे. मध्यरात्री १.४५ वाजताच्या सुमारास या गोदामाला आग लागल्याची माहिती अग्निशमन दलाला मिळाली. त्यानंतर अग्निशमनचे चार बंब आणि पाण्याचे टँकर घेऊन कर्मचारी-अधिकारी घटनास्थळी पोहोचले. सव्वा दोन तास शर्थीचे प्रयत्न केल्यानंतर आग आटोक्यात आणण्यात अग्निशमन कर्मचाऱ्यांना यश आलं, अशी माहिती अधिकाऱ्यांनी दिली. या आगीत कुणीही जखमी अथवा जीवितहानी झाली नाही, असंही अधिकाऱ्यांनी सांगितलं. दरम्यान, आग कशामुळं लागली याचं नेमकं कारण समजू शकलं नाही.

काळाचौकी परिसरात बंद गोदामाला आग

मुंबईत आगीच्या घटनांचे प्रमाण वाढतच आहे. दोनच दिवसांपूर्वी काळाचौकी परिसरातील अभ्युदय नगर येथील मिलान इंडस्ट्रीयल इस्टेट येथे एका इमारतीला आग लागल्याची घटना घडली होती. इमारतीतील एका बंद गोदामाला ही आग लागली होती.

अग्निसुरक्षा संचालकपद का भरले नाही?