Kalyan News: साखरझोपेत असताना घराला लागली आग, आईसह दोन मुली गंभीर जखमी

कल्याण : डोंबिवलीजवळील भोपर परिसरात साखरझोपेत असलेल्या एका कुटुंबावर शनिवारी आभाळ कोसळले. घरात अचानक लागलेल्या आगीत पती-पत्नीसह दोन मुली होरपळल्या. ही दुर्घटना शनिवारी पहाटे पाच वाजण्याच्या सुमारास घडली. ९० टक्के भाजलेल्या चौघांना खासगी रुग्णालयात दाखल करण्यात आले असून आईसह दोन मुलींची प्रकृती चिंताजनक असल्याचे डॉक्टरांनी सांगितले.

अशी घडली घटना

डोंबिवलीजवळील भोपर परिसरातील बस थांब्याजवळ प्रसाद पाटील पत्नी आणि दोन मुलींसह राहतात. शनिवारी पहाटे पाच वाजण्याच्या सुमारास चौघेही गाढ झोपेत असताना अचानक घरात आग लागली आणि काही कळायच्या आतच झोपेत असलेले प्रसाद यांच्यासह पत्नी प्रीती, १४ वर्षांची मुलगी समीरा आणि ११ वर्षांची मुलगी समीक्षा या आगीत जवळपास ९० टक्के होरपळले. घटनेची माहिती मिळताच शेजाऱ्यांनी धाव घेत आग विझवून जखमींना खासगी रुग्णालयात दाखल केले. पोलिस आणि अग्निशमन दलाचे कर्मचारी तातडीने घटनास्थळी पोहोचले. मात्र घरातील सिलिंडरचा स्फोट किंवा इतर विजेच्या उपकरणाचा स्फोट झाला नसल्याने ही आग नेमकी कशामुळे लागली याचा शोध पोलिसांनी सुरू केला आहे. दरम्यान, प्रथमदर्शनी घरातील शॉर्ट सर्किटमुळे ही आग लागली असावी, असा अंदाज पोलिसांनी वर्तवला असला तरी ही आग जाणीवपूर्वक लावली गेली असावी, असा पोलिसांना संशय आहे. त्यादृष्टीने पोलिस तपास सुरू असल्याचे मानपाडा पोलिस ठाण्याचे वरिष्ठ निरीक्षक शेखर बागडे यांनी सांगितले. पाटील पती-पत्नीमध्ये वाद होत असल्याची माहिती शेजाऱ्यांनी पोलिसांना दिली. या दुर्घटनेत पत्नी आणि दोन्ही मुली गंभीर भाजल्या असून प्रसाद किरकोळ भाजल्याने पोलिसांचा संशय बळावला आहे.