म. टा. खास प्रतिनिधी, मुंबई
अंधेरी चकाला येथील पेट्रोलपंपावर बुधवारी सकाळी दुचाकीवरून आलेल्या दोन अनोळखी तरुणांनी गोळीबार केला. लुटीच्या उद्देशाने हे दोघे आले असावेत, असा संशय व्यक्त करण्यात येत आहे. सुदैवाने या गोळीबारात कुणी जखमी झाले नाही. मात्र या घटनेमुळे चकाला परिसरात घबराट पसरली आहे.
चकाला येथील गुरूनानक पेट्रोलपंपावर पहाटे चार वाजता दोन मास्क लावलेले तरुण दुचाकीवरून आले. त्यांनी येथील कामगारांना बोलावले आणि कितीजण आहात असे विचारले. त्यावेळी एका कामगाराने तुम्हाला काय करायचे आहे, तुम्ही कोण, असी विचारणा करताच दुचाकीवर मागे बसलेल्या तरुणाने कामगारांच्या दिशेने गोळी झाडली. हे पाहून कामगारांनी पेट्रोलपंपावरील कार्यालयात धाव घेतली. त्यावेळी बंदुकीतील गोळी येथील एका टेबलाला लागली. या गोळीबारातून कामगार थोडक्यात बचावले. कामगारांनी आरडाओरड केल्यामुळे मास्क घातलेले दोघे पळून गेले. याप्रकरणी अंधेरी पोलिस ठाण्यात गुन्हा दाखल करण्यात आला असून, पेट्रोलपंप तसेच परिसरातील सीसीटीव्ही आणि कामगारांनी दिलेल्या वर्णनावरून पोलिस गोळीबार करणाऱ्यांचा शोध घेत आहेत.