१६ तासांच्या खोळंब्यानंतर पहिली ‘सीएसटी-पनवेल’ धावली

मटा ऑनलाइन वृत्त। मुंबई

पहाटे चार वाजण्याच्या सुमारास विस्कळीत झालेली हार्बर मार्गावरची वाहतूक तब्बल सोळा तासांच्या खोळंब्यानंतर सुरू झाली आहे. काही वेळापूर्वी म्हणजेच पावणे नऊ वाजता 'सीएसटी-पनवेल' ही पनवेलला जाणारी पहिली लोकल सीएटीहून रवाना झाली. यामुळे उशिरा का होईना पण कामावरून परतणाऱ्या चाकरमान्यांना मोठा दिलासा मिळाला आहे. असे असले तरी गाड्यांची वाहतूक धीम्या गतीने सुरू असल्याने हार्बर मार्गावर प्रवाशांची गर्दी उसळली आहे. त्यामुळे कामावरून घरी परतताना प्रवाशांना काही प्रमाणात मनस्ताप सहन करावा लागत आहे.

दरम्यान, वडाळ्याहून पनवेलसाठी ८.३५ वाजता पहिली लोकल सोडण्यात आली. ही लोकल सुटल्यानंतर पावणे नऊ वाजता थेट सीएसटी ते पनवेल अशी लोकल सुरू करण्यात आली.

लोकलच्या१८८ फेऱ्या रद्द

या अपघातामुळे झालेल्या सोळा तासांच्या खोळंब्यानंतर पावणे नऊ वाजता सीएसटी पनवेल लोकल सुरू होई पर्यंत तब्बल १८८ फेऱ्या रद्द करण्यात आल्याची माहिती मध्य रेल्वे प्रशासनाकड़ून देण्यात आली आहे.

गुरू तेग बहादूर नगर स्थानकाजवळ पहाटे मालगाडी घसरल्यानंतर हार्बर मार्गावरील सीएसटी ते पनवेल ही थेट वाहतूक पूर्णपणे ठप्प झाली होती. मात्र प्रवाशांच्या सोयीसाठी सीएसटी ते पनवेल अशी मेन लाइनवरून वाहतूक सुरू ठेवण्यात आली. याबरोबर सीएसटी ते अंधेरी अशी लोकलसेवाही सुरू होती. या दुर्घटनेमुळे प्रवाशांना मध्य रेल्वे आणि ट्रान्स हार्बर मार्गावरून प्रवास करण्याची मुभा देण्यात आली होती. याबरोबर प्रवाशांच्या सोयीसाठी वडाळा तसेच कुर्ला बस डेपोतून बेस्च बसेसही सोडण्यात आल्या होत्या.